នគរបាលអូម៉ង់ បាននិយាយកាលពីថ្ងៃអង្គារ (២៧ មករា) ក្នុងសារបង្ហោះមួយលើបណ្ដាញសង្គម X ថា អ្នកទេសចរបារាំង ៣នាក់ បានស្លាប់ នៅពេលទូកមួយគ្រឿងបានលិចនៅឆ្នេរសមុទ្រប្រទេសអូម៉ង់។

ទូកទេសចរណ៍ដែលដឹកមនុស្ស ២៥នាក់នោះ រួមមានក្រុមអ្នកទេសចរបារាំង មគ្គុទ្ទេសក៍ទេសចរណ៍ម្នាក់ និងអ្នកបើកទូក ហើយកំពុងជិះកម្សាន្តនៅចម្ងាយប្រមាណ ២,៥ ម៉ាយល៍ណត់ ពីកំពង់ផែស៊ុលតង់ Qaboos ក្នុងឈូងសមុទ្រអូម៉ង់ បន្ទាប់មកក៏បានក្រឡាប់លិច។ អាជ្ញាធរនិយាយថា ក្រៅពីអ្នកស្លាប់ អ្នកទេសចរជាច្រើននាក់បានរងរបួសស្រាល ខណៈការស៊ើបអង្កេតកំពុងតែបន្ត។

ក្រសួងការបរទេសបារាំង បានសម្តែងការចូលរួមរំលែកទុក្ខយ៉ាងក្រៀមក្រំដល់ក្រុមគ្រួសារជនរងគ្រោះ ហើយបាននិយាយនៅក្នុងសេចក្តីថ្លែងការណ៍មួយថា អាជ្ញាធរកុងស៊ុលបារាំង កំពុងធ្វើការជាមួយអាជ្ញាធរអូម៉ង់ ដើម្បីគាំទ្រដល់ក្រុមគ្រួសារសព ប៉ុន្តែមិនបានផ្តល់ព័ត៌មានលម្អិតបន្ថែមនោះទេ។

ប្រទេសអូម៉ង់ ដែលស្ថិតនៅលើជាយខាងកើតនៃឧបទ្វីបអារ៉ាប់ បានទាក់ទាញភ្ញៀវទេសចរមកពីជុំវិញពិភពលោកដោយសារភាពល្បីល្បាញខាងទេសចរណ៍មុជទឹកសមុទ្រ និងសម្រស់ធម្មជាតិរបស់ខ្លួន ទោះបីជាប្រទេសនេះនៅតែត្រូវបានជះស្រមោលដោយទីក្រុងឌុយបៃ ដែលពោរពេញទៅដោយអគារខ្ពស់ៗនៅក្នុងអេមីរ៉ាតអារ៉ាប់រួម ដែលនៅជិតខាងក៏ដោយ៕