ប្រធានាធិបតីអ៊ីរ៉ង់ លោក ម៉ាស៊ូដ ប៉េហ្ស៊េស្កីអាន(Masoud Pezeshkian) បានជួបសន្ទនាតាមទូរស័ព្ទជាមួយរជ្ជទាយាទរបស់ប្រទេសអារ៉ាប៊ីសាអ៊ូឌីត Mohammed bin Salman បន្ទាប់ពីនាវាផ្ទុកយន្តហោះរបស់សហរដ្ឋអាមេរិកបានទៅដល់តំបន់មជ្ឈឹមបូព៌ា ក្នុងពេលមានការព្រួយបារម្ភកាន់តែខ្លាំងឡើងអំពីជម្លោះថ្មីជាមួយអ៊ីស្រាអែល ឬសហរដ្ឋអាមេរិក។

សហរដ្ឋអាមេរិក បានបង្ហាញក្នុងសប្តាហ៍ថ្មីៗនេះថា ខ្លួនកំពុងពិចារណាវាយប្រហារអ៊ីរ៉ង់ក្នុងការឆ្លើយតបទៅនឹងការបង្ក្រាបរបស់ទីក្រុងតេអេរ៉ង់លើក្រុមអ្នកតវ៉ាបណ្តាលឲ្យមនុស្សរាប់ពាន់នាក់ស្លាប់។ ប្រធានាធិបតីសហរដ្ឋអាមេរិក លោក Donald Trump បានបញ្ជូននាវាផ្ទុកយន្តហោះ USS Abraham Lincoln ទៅកាន់តំបន់នោះ។

លោក Pezeshkian បាននិយាយវាយប្រហារទៅលើ «ការគំរាមកំហែង» របស់សហរដ្ឋអាមេរិកនៅក្នុងការសន្ទនាតាមទូរស័ព្ទជាមួយមេដឹកនាំអារ៉ាប៊ីសាអ៊ូឌីតកាលពីថ្ងៃអង្គារ ដោយនិយាយថា អាមេរិក «មាន បំណងធ្វើឲ្យរំខានដល់សន្តិសុខរបស់តំបន់ ហើយនឹងមិនទទួលបានអ្វីក្រៅពីអស្ថិរភាពនោះទេ»។

សេចក្តីថ្លែងការណ៍មួយពីការិយាល័យរបស់លោក Pezeshkian បាននិយាយកាលពីថ្ងៃអង្គារថា «លោកប្រធានាធិបតី បានបង្ហាញពីសម្ពាធ និងអរិភាពថ្មីៗទៅលើប្រទេសអ៊ីរ៉ង់ រួមទាំងសម្ពាធសេដ្ឋកិច្ច និងការជ្រៀតជ្រែកពីខាងក្រៅ ដោយបញ្ជាក់ថា សកម្មភាពបែបនេះបានបរាជ័យក្នុងការធ្វើឱ្យអន្តរាយដល់ភាពធន់ និងការទទួលស្គាល់របស់ប្រជាជនអ៊ីរ៉ង់»។

សេចក្តីថ្លែងការណ៍នេះក៏បាននិយាយផងដែរថា រជ្ជទាយាទព្រះអង្គម្ចាស់ Mohammed បានស្វាគមន៍ចំពោះការសន្ទនា និងបានបញ្ជាក់ជាថ្មីនូវការប្តេជ្ញាចិត្តរបស់ប្រទេសអារ៉ាប៊ីសាអ៊ូឌីតចំពោះស្ថិរភាព សន្តិសុខ និងការអភិវឌ្ឍក្នុងតំបន់»។