កងកម្លាំងរុស្ស៊ី បានចាប់ផ្តើមដកខ្លួនចេញពីទីតាំងនានា នៅភាគឦសានប្រទេសស៊ីរី ក្នុងតំបន់មួយដែលនៅតែគ្រប់គ្រងដោយកងកម្លាំងប្រជាធិបតេយ្យស៊ីរី(SDF) ដែលដឹកនាំដោយជនជាតិឃើដ បន្ទាប់ពីក្រុមនេះ បានបាត់បង់ទឹកដីភាគច្រើនរបស់ខ្លួន នៅក្នុងការវាយលុកដោយកងកម្លាំងរដ្ឋាភិបាល។

អ្នកសារព័ត៌មាន AP បានទៅពិនិត្យមើលមូលដ្ឋានមួយដែលនៅជាប់នឹងអាកាសយានដ្ឋាន Qamishli កាលពីថ្ងៃអង្គារ ហើយបានរកឃើញថា វាត្រូវបានការពារដោយយុទ្ធជន SDF ដែលបាននិយាយថា រុស្ស៊ីបានចាប់ផ្តើមរើគ្រឿងយុទ្ធោបករណ៍របស់ពួកគេចេញ ក្នុងរយៈពេលប៉ុន្មានថ្ងៃថ្មីៗនេះ។

នៅខាងក្នុងអ្វីដែលធ្លាប់ជាកន្លែងស្នាក់នៅសម្រាប់ទាហានភាគច្រើន គឺទទេស្អាត ជាមួយនឹងរបស់របរខ្លះ ដែលនៅសេសសល់ រួមទាំងឧបករណ៍ហាត់ប្រាណ ម្សៅប្រូតេអ៊ីន និងសម្លៀកបំពាក់មួយចំនួន។

លោក Ahmed Ali យុទ្ធជន SDF ដែលត្រូវបានដាក់ពង្រាយនៅទីតាំងនោះ បាននិយាយថា កងកម្លាំង    រុស្ស៊ី បានចាប់ផ្តើមដកចេញទីតាំងរបស់ពួកគេ នៅជុំវិញអាកាសយានដ្ឋានកាលពី ៥ ឬ ៦ថ្ងៃមុន ដោយដកយកគ្រឿងយុទ្ធោបករណ៍របស់ពួកគេចេញ តាមរយៈយន្តហោះដឹកទំនិញ។

លោកបាននិយាយថា៖«យើងមិនដឹងថាតើគោលដៅរបស់យន្តហោះដឹកបរិក្ខារយោធានោះ គឺប្រទេសរុស្ស៊ី ឬមូលដ្ឋានទ័ពអាកាស Hmeimim ទេ» ដោយសំដៅទៅលើមូលដ្ឋានរុស្ស៊ីសំខាន់នៅលើឆ្នេរសមុទ្រស៊ីរី។ «ពួកគេនៅតែមានវត្តមាននៅអាកាសយានដ្ឋាន Qamishli ហើយបានជម្លៀសបន្តិចម្តងៗ»។

អ្នកនាំពាក្យអង្គការសហប្រជាជាតិ លោក Stéphane Dujarric បាននិយាយថា ក្បួនរថយន្តមនុស្សធម៌របស់UN ចេញពីទីក្រុងដាម៉ាស បានទៅដល់ទីក្រុង Qamishli កាលពីថ្ងៃអង្គារហើយ។

លោកបានប្រាប់អ្នកយកព័ត៌មានUNថា៖«ពួកគេបានដឹកជញ្ជូនអាហារ សម្លៀកបំពាក់កក់ក្តៅ និងភួយ ក្នុងចំណោមសម្ភារៈផ្សេងៗទៀត។ ក្បួនរថយន្តជាច្រើនទៀត ត្រូវបានគ្រោងនឹងចេញដំណើរ នៅថ្ងៃខាងមុខនេះ»៕