ប្រភពយោធា និងកងជីវពល បានប្រាប់ សារព័ត៌មាន AFP កាលពីថ្ងៃអង្គារថា យ៉ាងហោចណាស់ទាហាននីហ្សេរីយ៉ា ៩នាក់ ត្រូវបានសម្លាប់ និងជាង ១០នាក់ កំពុងបាត់ខ្លួន បន្ទាប់ពីក្រុមសកម្មប្រយុទ្ធដែលមានសម្ព័ន្ធភាពជាមួយក្រុមរដ្ឋអ៊ីស្លាម Daesh បានពួកស្ទាក់វាយឆ្មក់ការល្បាតយោធាមួយ នៅភាគឦសាននៃរដ្ឋ Borno។

ប្រភពព័ត៌មាន បានឲ្យដឹងថា ក្រុមយុទ្ធជនមកពីក្រុមក្រុមភេរវករ Daesh-WAP នៅក្នុងខេត្តអាហ្វ្រិកខាងលិច កាលពីថ្ងៃសុក្រ បានប្រើប្រាស់គ្រឿងផ្ទុះ និងកាំភ្លើង ដើម្បីវាយប្រហារលើទាហានមួយក្រុមមានជាង ៣០នាក់ ដែលកំពុងល្បាតថ្មើរជើង នៅខាងក្រៅទីក្រុង Damask ជិតព្រំដែនជាមួយប្រទេសនីហ្សេរីយ៉ា។ 

មន្ត្រីយោធាម្នាក់ បាននិយាយថា៖«យើងបានបាត់បង់ទាហាន ៩នាក់ នៅក្នុងការពួនស្ទាក់វាយប្រហារ ដោយក្រុមភេរវករ Daesh-WAP ហើយមនុស្សជាច្រើននាក់ទៀត កំពុងបាត់ខ្លួន»។

មន្ត្រីដែលស្នើសុំមិនបញ្ចេញឈ្មោះ បានអះអាងថា ទាហានដែលនៅចម្ងាយ ២៥ គីឡូម៉ែត្រ (១៥ ម៉ាយ) ពីមូលដ្ឋានរបស់ពួកគេ បានរត់បែកផ្លូវគ្នាគ្រប់ទិសទី បន្ទាប់ពីការបាញ់ប្រហារជាបន្តបន្ទាប់ពីក្រុមសកម្មប្រយុទ្ធ។

លោកបាននិយាយថា៖«ក្រុមភេរវករបានបំផ្ទុះគ្រឿងផ្ទុះ ដែលពួកគេបានដាក់បង្កៃនៅលើផ្លូវជាមុន ដោយធ្វើឲ្យចំនួនអ្នកស្លាប់ និងរបួសកើនឡើង និងភាពច្របូកច្របល់ក្នុងចំណោមទាហាន»។

មន្ត្រីរូបនេះ បានបន្ថែមថា ទាហាន ៨នាក់ បានព្យាយាមត្រឡប់ទៅមូលដ្ឋានវិញ ខណៈដែលអ្នកដទៃទៀត នៅបាត់ខ្លួន ក្នុងនោះមានមេបញ្ជាការរបស់ពួកគេ ដែលមានឋានៈជាវរសេនីយ៍ឯកផងដែរ៕