ប្រធានាធិបតីអ៊ុយក្រែន លោក Volodymyr Zelenskyy បានប្រកាសថា ទីក្រុងគីវ កំពុងដាក់គោលដៅចូលរួមជាមួយសហភាពអឺរ៉ុប នៅក្នុងឆ្នាំ២០២៧។ បន្ទាប់ពីកិច្ចសន្ទនាតាមទូរសព្ទជាមួយអធិការបតីអូទ្រីស លោក Zelenskyy បានបង្ហោះសារលើបណ្ដាញសង្គម X ថា សមាជិកភាពសហភាពអឺរ៉ុប អាចជាផ្នែកមួយនៃការធានាសន្តិសុខអន្តរជាតិជាច្រើន បន្ទាប់ពីបញ្ចប់សង្គ្រាម។

លោក Zelenskyy បាននិយាយថា «ការចូលជាសមាជិកសហភាពអឺរ៉ុប របស់អ៊ុយក្រែន គឺជាការធានាសន្តិសុខដ៏សំខាន់មួយ មិនត្រឹមតែសម្រាប់អ៊ុយក្រែនប៉ុណ្ណោះទេ ប៉ុន្តែក៏សម្រាប់អឺរ៉ុបទាំងមូលផងដែរ»។ លោកបន្ថែមថា អ៊ុយក្រែនរួមចំណែកដល់កម្លាំងរួមរបស់អឺរ៉ុបក្នុងវិស័យសន្តិសុខ បច្ចេកវិទ្យា និងសេដ្ឋកិច្ច ដោយសង្កត់ធ្ងន់ថា «នោះហើយជាមូលហេតុដែលទីក្រុងគីវ កំណត់កាលបរិច្ឆេទជាក់លាក់មួយ គឺឆ្នាំ ២០២៧ ដោយពឹងផ្អែកលើការគាំទ្រពីដៃគូ»។

គួរឱ្យដឹងថា អ៊ុយក្រែន បានទទួលឋានៈជាបេក្ខភាពសមាជិកនៅឆ្នាំ២០២២ បន្ទាប់ពីប្រតិបត្តិការយោធាទ្រង់ទ្រាយធំរបស់រុស្ស៊ី បានចាប់ផ្ដើម ហើយកិច្ចចរចាចូលជាសមាជិកក៏បានបើកជាផ្លូវការនៅឆ្នាំ២០២៤។ ប៉ុន្តែហុងគ្រី កំពុងរារាំងមិនឱ្យបើកជំពូកចរចាជាបន្តបន្ទាប់នោះទេ ដោយនិយាយថា ការចូលជាសមាជិករបស់អ៊ុយក្រែន នឹងនាំមកនូវការគំរាមកំហែងសន្តិសុខ និងហានិភ័យសេដ្ឋកិច្ច។

ប្រភពពីមន្ត្រីសហភាពអឺរ៉ុបមួយរូបដែលដឹងអំពីដំណើរការចូលជាសមាជិកនេះ បានបញ្ជាក់ថា អ្វីដែលហៅថា «ការធ្វើសមាហរណកម្មបន្តិចម្តងៗ» ក៏ស្ថិតនៅលើតុពិភាក្សាផងដែរទាក់ទងនឹងសមាជិកភាពរបស់អ៊ុយក្រែន៕