នៅថ្ងៃពុធនេះ តុលាការកូរ៉េខាងត្បូង បានកាត់ទោសអតីតស្រ្តីទី ១ Kim Keon Hee ឲ្យជាប់ពន្ធនាគាររយៈពេល ២០ខែ ក្រោយរកឃើញទោសកំហុសរបស់លោកស្រី ក្នុងការទទួលយកសំណូកពីក្រុមមន្រ្តីព្រះវិហារបង្រួបបង្រួម ជាថ្នូរនឹងផលប្រយោជន៍នយោបាយ ។

តុលាការបានផ្តល់ភាពគ្មានទោសដល់លោកស្រី Kim គឺជាភរិយាអតីតប្រធានាធិបតីកូរ៉េខាងត្បូងលោក Yoon Suk Yeol ដែលត្រូវបានទម្លាក់ចេញពំអំណាចកាលពីឆ្នាំមុននោះ សម្រាប់ករណីចោទប្រកាន់រៀបចំតម្លៃភាគហ៊ុន និងការរំលោភលើច្បាប់មូលនិធិនយោបាយ ។

សេចក្តីសម្រេចនេះ ដែលអាចប្តឹងឧទ្ធរណ៍ដោយអតីតស្រ្តីទី ១រូបនេះ ឬក្រុមរដ្ឋអាជ្ញា បានកើតមានឡើង ស្របពេលការកាត់ក្តីជាច្រើន បន្ទាប់ពីការស៊ើបអង្កេតលើការប្រកាសច្បាប់អាជ្ញាសឹកមួយភ្លែតរបស់លោក Yoon កាលពីឆ្នាំ ២០២៤ និងរឿងអាស្រូវពាក់ព័ន្ធជាមួយស្វាមី-ភរិយាដែលធ្លាប់មានអំណាចមួយគូនេះ ។

ក្រុមរដ្ឋអាជ្ញាបានទាមទារកាត់ទោសលោកស្រី Kim ឲ្យជាប់ពន្ធនាគាររយៈពេល ១៥ឆ្នាំ និងផាកពិន័យទឹកប្រាក់ ២លានដុល្លារ ពាក់ព័ន្ធនឹងការចោទប្រកាន់ជាច្រើន រួមទាំងការទទួលយកកាបូបប្រណីត Chanel និងខ្សែក.ពេជ្រពីព្រះវិហារបង្រួបបង្រួមកូរ៉េខាងត្បូង ជាថ្នូរនឹងផលប្រយោជន៍នយោបាយ ។

តុលាការរុកឃើញថា គ្មានភ័ស្តុតាងគ្រប់គ្រាន់ ដើម្បីសន្និដ្ឋានថា លោកស្រី Kim មានទោសក្នុងករណីចោទប្រកាន់រៀបចំតម្លៃភាគហ៊ុន និងការរំលោភលើច្បាប់មូលនិធិនយោបាយ ។

លោកស្រី Kimបានច្រានចោលរាល់ការចោទប្រកាន់ទាំងអស់ ហើយក្រុមមេធាវីរបស់លោកស្រីនិយាយថា ក្រុមការងារពួកគេនឹងពិនិត្យមើលសេចក្តីសម្រេចរបស់តុលាការ ហើយនិងសម្រេចចិត្តថាតើគួរប្តឹងឧទ្ធរណ៍ដែរឬយ៉ាងណាចំពោះការកាត់ទោសពីបទទទួលយកសំណូកមួយនេះ ៕