នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអង្គារ (ទី២៧ ខែមករា ឆ្នាំ២០២៦) នេះថា ការរៀបចំការបោះឆ្នោត នាពេលនេះ នឹងជា «កំហុសឆ្គង» ខណៈដែលលោកប្រឈមនឹងលទ្ធភាពដែលអាចមានការបោះឆ្នោមុនអាណត្តិ ប្រសិនបើលោកបរាជ័យក្នុងការអនុម័តថវិកាជាតិ។

កញ្ចប់ថវិកានេះ នឹងត្រូវបានបង្ហាញដោយការអាននៅថ្ងៃទី២៨ ខែមករានេះ ក្នុងរដ្ឋសភាអ៊ីស្រាអែល ជាកន្លែងដែលរដ្ឋាភិបាលចម្រុះរបស់លោក Netanyahu អាចមានសំឡេងភាគច្រើនបាន ដោយសារតែការគាំទ្រមិនប្រាកដប្រជារបស់អតីតសម្ព័ន្ធមិត្ត។

លោក Netanyahu បានថ្លែងនៅក្នុងសន្និសីទសារព័ត៌មានតាមទូរទស្សន៍ថា៖ «ជាការពិតណាស់ ខ្ញុំព្រួយបារម្ភ។ ខ្ញុំគិតថា យើងកំពុងស្ថិតក្នុងស្ថានភាពរសើបខ្លាំង»។

លោកបានបញ្ជាក់ថា៖ «ខ្ញុំគិតថា រឿងចុងក្រោយដែលយើងត្រូវការឥឡូវនេះ គឺការបោះឆ្នោត។ យើងនឹងមានការបោះឆ្នោត នាចុងឆ្នាំនេះ ប៉ុន្តែខ្ញុំគិតថា វាគឹជាកំហុសឆ្គងក្នុងការរៀបចំការបោះឆ្នោតឥឡូវនេះ»។

ប្រសិនបើមិនមានការអនុម័តកញ្ចប់ថវិកានៅថ្ងៃទី៣១ ខែមីនាទេនោះ ការបោះឆ្នោតមុនកំណត់ នឹងមានឡើង។ ការបោះឆ្នោតនោះនឹងត្រូវធ្វើឡើងនៅខែវិច្ឆិកា។

លោក Netanyahu ក្នុងនាមជាមេដឹកនាំគណបក្ស Likud ដែលជាគណបក្សស្តាំនិយមដ៏ធំរបស់អ៊ីស្រាអែល បានកាន់តំណែងជានាយករដ្ឋមន្ត្រីរបស់ប្រទេសយូរបំផុត ដោយសរុបជាង ១៨ឆ្នាំ ក្នុងរយៈពេលជាច្រើនអាណត្តិ គិតចាប់តាំងពីឆ្នាំ១៩៩៦ ហើយបានបង្ហើបរួចហើយថា លោកមានបំណងចង់ឈរឈ្មោះម្តងទៀត៕