មន្ត្រីជាន់ខ្ពស់កោះតៃវ៉ាន់ និងសហរដ្ឋអាមេរិក បានពិភាក្សាអំពីកិច្ចសហប្រតិបត្តិការ ក្នុងវិស័យបញ្ញាសិប្បនិម្មិត (AI) បច្ចេកវិទ្យា និងយានដ្រូន នៅក្នុងវេទិកាកម្រិតខ្ពស់មួយ ដែលបានចាប់ផ្តើមអំឡុងរដ្ឋបាលអាណត្តិដំបូងរបស់លោកប្រធានាធិបតី Donald Trump ដោយក្រសួងការបរទេសសហរដ្ឋអាមេរិក បានសរសើរទីក្រុងតៃប៉ិថា ជា «ដៃគូដ៏សំខាន់»។

សហរដ្ឋអាមេរិក គឺជាអ្នកគាំទ្រអន្តរជាតិ និងជាអ្នកផ្គត់ផ្គង់អាវុធដ៏សំខាន់បំផុតរបស់កោះតៃវ៉ាន់ ទោះបីជាមិនមានចំណងការទូតផ្លូវការក៏ដោយ។ កិច្ចសន្ទនាភាពជាដៃគូវិបុលភាពសេដ្ឋកិច្ច រវាងសហរដ្ឋអាមេរិក និងកោះតៃវ៉ាន់ (US-Taiwan Economic Prosperity Partnership Dialogue) បានធ្វើឡើងជាលើកដំបូងក្នុងខែវិច្ឆិកា ឆ្នាំ២០២០។

នៅក្នុងសេចក្តីថ្លែងការណ៍មួយ កាលពីថ្ងៃអង្គារ (ទី២៧ ខែមករា ឆ្នាំ២០២៦) ក្រសួងការបរទេស បានឲ្យដឹងថា កិច្ចពិភាក្សាជុំទី៦ បានធ្វើឡើង ដែលដឹកនាំដោយរដ្ឋមន្ត្រីក្រសួងសេដ្ឋកិច្ច លោក Jacob Helberg និងអាជ្ញាធរសេដ្ឋកិច្ចកោះតៃវ៉ាន់ លោក Kung Ming-hsin ដែលកំពុងធ្វើទស្សនកិច្ចនៅសហរដ្ឋអាមេរិក។

ក្រសួងការបរទេសបានឲ្យដឹងថា ភាគីទាំង២ បានចុះហត្ថលេខាលើសេចក្តីថ្លែងការណ៍ ស្តីពីសេចក្តីប្រកាស Pax Silica ដែលគំនិតផ្តួចផ្តើមដឹកនាំដោយសហរដ្ឋអាមេរិក ដើម្បីធានាខ្សែច្រវាក់ផ្គត់ផ្គង់ AI និងបន្ទះឈីប ហើយនិងកិច្ចសហប្រតិបត្តិការ រវាងសហរដ្ឋអាមេរិក និងកោះតៃវ៉ាន់ ជុំវិញសន្តិសុខសេដ្ឋកិច្ច ។

ក្រសួងការបរទេសបានបន្ថែមថា៖ «កោះតៃវ៉ាន់ គឺជាដៃគូដ៏សំខាន់ ពាក់ព័ន្ធនឹងគំនិតផ្តួចផ្តើមសេដ្ឋកិច្ចសំខាន់ៗទាំងនេះ និងផ្សេងទៀត ហើយវិស័យផលិតកម្មកម្រិតខ្ពស់របស់កោះនេះដើរតួនាទីយ៉ាងសំខាន់ ក្នុងការជំរុញបដិវត្តន៍ AI»៕