របាយការណ៍ចារកម្មអាមេរិក បានលើកឡើងពីមន្ទិលសង្ស័យ អំពីថា តើប្រធានាធិបតីស្ដីទីរបស់វ៉េណេស៊ុយអេឡា គឺលោកស្រី Delcy Rodriguez នឹងសហការជាមួយរដ្ឋបាលរបស់លោកប្រធានាធិបតី Donald Trump ដោយកាត់ផ្តាច់ទំនាក់ទំនងជាផ្លូវការជាមួយគូសត្រូវរបស់សហរដ្ឋអាមេរិកជាដែរ ឬអត់។ នេះបើយោងតាមបុគ្គល ៤នាក់ដែលដឹងពីអ្វីនៅក្នុងរបាយការណ៍ នាប៉ុន្មានថ្ងៃថ្មីៗនេះ។

មន្ត្រីអាមេរិកទាំងនោះ បាននិយាយជាសាធារណៈថា ពួកគេចង់ឲ្យប្រធានាធិបតីបណ្តោះអាសន្នកាត់ផ្តាច់ទំនាក់ទំនងជាមួយសម្ព័ន្ធមិត្តអន្តរជាតិជិតស្និទ្ធ ដូចជាអ៊ីរ៉ង់ ចិន និងរុស្ស៊ី រួមមានទាំងការបណ្តេញអ្នកការទូត និងទីប្រឹក្សារបស់ពួកគេចេញពីប្រទេសវ៉េណេស៊ុយអេឡាផងដែរ។

ប៉ុន្តែលោកស្រី Rodriguez ដែលពិធីស្បថចូលកាន់តំណែងរបស់លោកស្រី ត្រូវបានចូលរួមដោយតំណាងនៃប្រទេសទាំងនោះ កាលពីដើមខែនេះ មិនទាន់បានប្រកាសជាសាធារណៈនៅឡើយទេ អំពីចំណាត់បែបនេះ។ លោកស្រីបានក្លាយជាប្រធានាធិបតី បន្ទាប់ពីសហរដ្ឋអាមេរិកបានចាប់ខ្លួនអតីតមេដឹកនាំវ៉េណេស៊ុយអេឡា លោក Nicolas Maduro កាលពីថ្ងៃទី៣ ខែមករា។

របាយការណ៍ចារកម្មអាមេរិក បានឲ្យដឹងថា វាមិនទាន់ច្បាស់លាស់នោះទេថា តើលោកស្រីយល់ស្របទាំងស្រុងជាមួយយុទ្ធសាស្ត្ររបស់សហរដ្ឋអាមេរិក នៅក្នុងប្រទេសរបស់លោកស្រីដែរ ឬអត់។ នេះបើយោងតាមប្រភពដែលបាននិយាយក្នុងលក្ខខណ្ឌមិនបញ្ចេញឈ្មោះ។

នាយក CIA (ទីភ្នាក់ងារសើបការណ៍សម្ងាត់កណ្ដាល) លោក John Ratcliffe បានធ្វើដំណើរកាលពីថ្ងៃទី១៥ ខែមករាទៅកាន់ទីក្រុងការ៉ាកាស ជាកន្លែងដែលលោកបានពិភាក្សាអំពីអនាគតនយោបាយរបស់ប្រទេសនេះជាមួយលោកស្រី Rodriguez។ ទីក្រុងវ៉ាស៊ីនតោនចង់ទប់ស្កាត់ឥទ្ធិពលនៃគូបដិបក្ខរបស់ខ្លួន នៅអឌ្ឍគោលខាងលិច រួមទាំងនៅវ៉េណេស៊ុយអេឡាផង ជាកន្លែងដែលលោក Trump ស្វែងរកការទាញប្រយោជន៍ពីប្រេងបម្រុងដ៏ច្រើនរបស់ប្រទេសនៃប្លុក OPEC។ ប្រសិនបើលោកស្រី Rodriguez ផ្តាច់ទំនាក់ទំនងជាមួយគូប្រជែងអាមេរិក វានឹងបើកឱកាសកាន់តែច្រើនឲ្យមានការវិនិយោគរបស់សហរដ្ឋអាមេរិក នៅក្នុងវិស័យថាមពលរបស់វ៉េណេស៊ុយអេឡា៕