នាយករដ្ឋមន្ត្រីកាណាដា លោក Mark Carney បានប្រាប់សភាកាលពីថ្ងៃអង្គារ (ទី២៧ ខែមករា ឆ្នាំ២០២៦) ថា នាពេលនេះ «មិនមានអ្វីធម្មតានោះទេ» ពាក់ព័ន្ធនឹងការដោះស្រាយជាមួយសហរដ្ឋអាមេរិក ខណៈដែលលោកត្រូវប្រឈមនឹងសំណួរ អំពីដំណោះស្រាយនៃទំនាក់ទំនងជាមួយប្រធានាធិបតី លោក Donald Trump។

លោក Carney បានវិលត្រឡប់ទៅកាន់ទីក្រុង Ottawa វិញ បន្ទាប់ពីថ្លែងសុន្ទរកថាដ៏ទូលំទូលាយមួយ នៅឯវេទិកាសេដ្ឋកិច្ចពិភពលោក (WEF) កាលពីសប្តាហ៍មុន ដោយលោកបានលើកឡើងថា សណ្តាប់ធ្នាប់អន្តរជាតិដែលផ្អែកលើច្បាប់ដឹកនាំដោយទីក្រុងវ៉ាស៊ីនតោនអស់រយៈពេលជាច្រើនទសវត្សរ៍មកហើយនោះ កំពុងស្ថិតក្នុង «ការបែកបាក់»។

សុន្ទរកថានេះ ដែលក៏បានព្រមានដល់មហាអំណាចកណ្តាលកុំឲ្យសង្ឃឹមថា «ការអនុលោមតាម» នឹងជួយសង្គ្រោះពួកគេមិនឲ្យមានការឈ្លានពានពីសំណាក់មហាអំណាចធំៗនោះ ក៏ទទួលបានការសរសើរដ៏កម្រផងដែរពីអ្នកនយោបាយគណបក្សផ្សេង នៅក្នុងប្រទេសកាណាដាផងដែរ។

មេដឹកនាំគណបក្សប្រឆាំង និងជាប្រធានគណបក្សអភិរក្សនិយម លោក Pierre Poilievre ដែលជាធម្មតាជាអ្នករិះគន់តែម្ខាងមិនចេះនឿយហត់ បានចាត់ទុកថា ជាការថ្លែង «ដែលត្រូវបានរៀបចំយ៉ាងល្អ និងប៉ិនប្រសប់»។

មេដឹកនាំគណបក្ស Bloc Quebecois លោក Yves Francois Blanchet បាននិយាយថា វា «ជាការធ្វើឲ្យមានភាពធូរស្រាល និងការសន្យា»។ ប៉ុន្តែនៅពេលដែលសភាបានចាប់ផ្តើមសម័យប្រជុំសភាថ្មី កាលពីថ្ងៃអង្គារ លោក Blanchet បានវាយប្រហារលោក Carney ជុំវិញការគ្រប់គ្រងទំនាក់ទំនងរបស់លោកជាមួយសហរដ្ឋអាមេរិក។

លោក Blanchet បានកត់សម្គាល់ថា មិនមានវឌ្ឍនភាពណាមួយនោះឡើយ ក្នុងការឆ្ពោះទៅរកការបន្ធូរបន្ថយពន្ធរបស់លោក Trump ដែលជាគោលនយោបាយប៉ះពាល់ដល់ផ្នែកសំខាន់ៗនៃសេដ្ឋកិច្ចរបស់ប្រទេសកាណាដា ហើយបានសួរលោក Carney ថា តើការចរចាជាមួយសហរដ្ឋអាមេរិក គឺប្រព្រឹត្តទៅ «ធម្មតា និងស្និទ្ធស្នាល» ដែរ ឬទេ។

នាយករដ្ឋមន្ត្រី បាននិយាយជាភាសាបារាំងថា៖ «ពិភពលោកបានផ្លាស់ប្តូរ។ ទីក្រុងវ៉ាស៊ីនតោនបានផ្លាស់ប្តូរ។ ស្ទើរតែគ្មានអ្វីធម្មតានោះឡើយ នៅសហរដ្ឋអាមេរិក ឥឡូវនេះ។ នោះជាការពិត»។ ហើយលោក Carney បានប្រាប់សភាថា កាលពីថ្ងៃចន្ទ លោកបាននិយាយជាមួយលោក Trump ប្រហែល ៣០នាទី ពីបញ្ហានានា ក្នុងនោះរួមទាំងអំពីពាណិជ្ជកម្មផងដែរ៕