អាជ្ញាធរបានប្រាប់ឲ្យដឹងថា ព្យុះ Kristin បានធ្វើឲ្យប្រជាជនជាង ៨០០.០០០នាក់ នៅទូទាំងភាគកណ្តាល និងភាគខាងជើងនៃប្រទេសព័រទុយហ្គាល់គ្មានអគ្គិសនីប្រើប្រាស់ នាព្រឹកថ្ងៃពុធ (ទី២៨ ខែមករា ឆ្នាំ២០២៦) នេះ ដោយបានរំលំដើមឈើ និងបង្គោលភ្លើង បំផ្លាញផ្ទះសម្បែង និងរំខានដល់ចរាចរណ៍លើផ្លូវហាយវេ និងផ្លូវដែក មុនពេលបក់បោកចូលទៅអេស្ប៉ាញ។

បើយោងតាមទីភ្នាក់ងារសង្គ្រោះបន្ទាន់ បានឲ្យដឹងថា យ៉ាងហោចណាស់មនុស្សម្នាក់បានបាត់បង់ជីវិត នៅពេលដែលដើមឈើមួយបានដួលរលំលើរថយន្តរបស់ពួកគេ នៅតំបន់ Vila Franca de Xira ជាយក្រុង Lisbon របស់ព័រទុយហ្គាល់។

អាជ្ញាធរការពារជនស៊ីវិល បានរាយការណ៍ពីឧប្បត្តិហេតុ ទាក់ទងនឹងអាកាសធាតុនេះប្រហែល ១.៥០០ករណី ដែលបង្កឡើងដោយខ្យល់បក់បោកក្នុងល្បឿនរហូតដល់ ១៥០គីឡូម៉ែត្រ ក្នុងមួយម៉ោង ភ្លៀងធ្លាក់ខ្លាំង និងមានទាំងព្រិលធ្លាក់នៅក្នុងប្រទេសដែលមានប្រជាជនជិត ១១លាននាក់នេះ។

ប្រតិបត្តិករបណ្តាញអគ្គិសនី E-Redes បានឲ្យដឹងថា ក្រុមបច្ចេកទេសកំពុងធ្វើការ ដើម្បីស្ដារការផ្គត់ផ្គង់ថាមពលឡើងវិញដល់អតិថិជនប្រហែល ៨៥៥.០០០នាក់ បន្ទាប់ពីកិច្ចប្រឹងប្រែងដំបូងរបស់ពួកគេ ត្រូវបានរារាំងដោយអាកាសធាតុអាក្រក់ខ្លាំង។

បន្ទាប់មកព្យុះនេះ បានបក់បោកតម្រង់ទៅភាគខាងកើតចូលប្រទេសអេស្ប៉ាញដែលពេលនេះនៅតែកំពុងដោះស្រាយជាមួយនឹងផលប៉ះពាល់ពីព្យុះមុននេះ គឺព្យុះ Joseph។ នៅក្នុងទីក្រុងឆ្នេរសមុទ្រ Torremolinos ខ្យល់បក់ខ្លាំង បានធ្វើឲ្យដើមត្នោតមួយដើមរលំ កាលពីថ្ងៃអង្គារ ដោយបានបណ្ដាលឲ្យស្ត្រីម្នាក់ស្លាប់។

ផ្លូវជាង ១៦០ខ្សែ នៅទូទាំងអេស្ប៉ាញ ត្រូវបានរងប៉ះពាល់ដោយសារព្រិលទឹកកក នាថ្ងៃពុធនេះ ក្នុងនោះរួមទាំងផ្លូវធំៗ ២៧ខ្សែ នៅលើបណ្តាញផ្លូវហាយវេសំខាន់ៗផងដែរ។ អាជ្ញាធរមូលដ្ឋានបានបិទឧទ្យាននានា ហើយនៅតំបន់ខ្លះ សកម្មភាពកីឡាក្រៅផ្ទះ និងការអប់រំ ត្រូវបានផ្អាក៕