រដ្ឋមន្ត្រីការបរទេសទួរគី នៅថ្ងៃពុធ (ទី២៨ ខែមករា ឆ្នាំ២០២៦) នេះ បានជំរុញឲ្យសហរដ្ឋអាមេរិកដោះស្រាយជម្លោះរបស់ខ្លួនជាមួយអ៊ីរ៉ង់ «ម្តងមួយៗ» ជំនួសឲ្យមានកិច្ចព្រមព្រៀងដ៏ទូលំទូលាយ ដោយនិយាយថា វានឹងបញ្ចៀសការធ្វើឲ្យមន្ត្រីអ៊ីរ៉ង់អាម៉ាស់ ហើយបានបន្ថែមថា ទីក្រុងតេអេរ៉ង់បានត្រៀមខ្លួនរួចជាស្រេចហើយ សម្រាប់ការចរចា ជុំវិញកម្មវិធីនុយក្លេអ៊ែររបស់ខ្លួន។

ប្រធានាធិបតីអាមេរិក លោក Donald Trump បាននិយាយកាលពីសប្តាហ៍មុនថា ទីក្រុងវ៉ាស៊ីនតោន បានបញ្ចូន «កងនាវា» ឆ្ពោះទៅកាន់ប្រទេសអ៊ីរ៉ង់ ប៉ុន្តែសង្ឃឹមថា លោកនឹងមិនចាំបាច់ប្រើប្រាស់វានោះទេ ខណៈដែលលោកបានព្រមានឡើងវិញដល់ទីក្រុងតេអេរ៉ង់កុំឲ្យសម្លាប់អ្នកតវ៉ា ឬចាប់ផ្តើមកម្មវិធីនុយក្លេអ៊ែររបស់ខ្លួនឡើងវិញ។

ទីក្រុងតេអេរ៉ង់បានបង្ក្រាបយ៉ាងឃោរឃៅលើការតវ៉ាប្រឆាំងនឹងរដ្ឋាភិបាល នាដើមខែនេះ ដែលនាំឲ្យមានការស្លាប់ និងការចាប់ខ្លួនមនុស្សរាប់ពាន់នាក់។ មន្ត្រីបានស្តីបន្ទោសភាពចលាចលនេះទៅលើ «ភេរវករប្រដាប់អាវុធ និងក្រុមកុបកម្ម» ដែលជាប់ទាក់ទងនឹងសត្រូវរបស់អ៊ីរ៉ង់ គឺសហរដ្ឋអាមេរិក និងអ៊ីស្រាអែល។ ក្រុមសិទ្ធិមនុស្សពណ៌នាការតវ៉ានេះថា ជាការតវ៉ាដ៏ធំបំផុត គិតចាប់តាំងពីបដិវត្តន៍ឆ្នាំ១៩៧៩។

រដ្ឋមន្ត្រីការបរទេស លោក Hakan Fidan បានបញ្ជាក់ជាថ្មីថា ទួរគីប្រឆាំងនឹងការអន្តរាគមន៍ពីបរទេស ឬការវាយប្រហារណាមួយលើអ៊ីរ៉ង់ ដោយនិយាយថា វានឹងជាការ «ខុសឆ្គង ក្នុងការចាប់ផ្តើមសង្គ្រាមម្តងទៀត»។ ការផ្ដល់មតិយោបល់របស់ខ្ញុំ ដែលតែងមានចំពោះមិត្តភក្តិអាមេរិកនោះ គឺថា ដោះស្រាយម្តងមួយៗជាមួយអ៊ីរ៉ង់។ ចាប់ផ្តើមជាមួយនុយក្លេអ៊ែរ ហើយបញ្ចប់វា ហើយបន្ទាប់មកបញ្ហាផ្សេងទៀតបន្តបន្ទាប់គ្នា»៕