យោងតាមការអះអាងរបស់ក្រុមអ្នកសា្រវជ្រាវ បានឲ្យដឹងថា វិធីសាស្រ្តថ្មីនៃការតាមដានកម្ទេចកម្ទីអវកាសធ្លាក់ និងអាចធ្លាក់ ដោយប្រើប្រាស់បណ្តាញឧបករណ៍ចាប់សញ្ញារញ្ជួយដី មានបំណងរករញ្ជួយដីនោះ អាចធ្វើឲ្យការឆ្លើយតបរបស់ពួកយើងល្អប្រសើរជាងមុន ពេលដែលកម្ទេចកម្ទីអវកាសធ្លាក់មកលើផែនដី ។

បច្ចេកទេសថ្មីដែលបង្កើតឡើងដោយលោកវេជ្ជបណ្ឌិត Constantinos Charalambous គឺជាអ្នកវិទ្យាសាស្រ្តភពនៅមហាវិទ្យាល័យចក្រពត្តិក្រុងឡុងដ្រ៍ ជាមួយក្រុមអ្នកសម្របសម្រួលមកពីសាកលវិទ្យាល័យ Johns Hopkins នឹងប្រើប្រាស់ទិន្នន័យរញ្ជួយដី ដើម្បីគណនាគន្លង ល្បឿន រយៈកម្ពស់ និងលំនាំបែកនៃកម្ទេចកម្ទីអវកាស ពេលដែលវាធ្លាក់ចុះ ។

លោក Charalambous និយាយប្រាប់ទីភ្នាក់ងារព័ត៌មានរ៉យទ័រថា ពួកយើងព្យាយាមដោះស្រាយបញ្ហឈឺក្បាលធំបំផុតនៃកម្ទេចកម្ទីអវកាសមិនអាចគ្រប់គ្រងបាន ជាពិសេសអំឡុងពេលដំណាក់កាលដែលកម្ទេចកម្ទីនោះបែក គឺដំណាក់កាលបែក ។ នោះគឺជាពេលដែលអ្វីៗអាចវឹកវរ ហើយការតាមដានអាចនឹងមានដែនកំណត់ ។

លោកបន្តថា អ្វីដែលពួកយើងរកឃើញ គឺសំឡេងផ្ទុះដ៏ខ្លាំង រលករញ្ជួយបង្កឡើងដោយសារកម្ទេចកម្ទីយានអវកាសដែលធ្វើដំណើរក្នុងល្បឿនរហូតដល់ ៨គ.មក្នុង ១វិនាទី ។

ទោះបីជាយ៉ាងណាក៏ដោយ វិធីតាមដានបច្ចុប្បន្ន ពិបាកព្យាករឲ្យបានត្រឹមត្រូវទីតាំងធ្លាក់កម្ទេចកម្ទីអវកាស ជាពិសេសនៅពេលដែលវត្ថុចាប់ផ្តើមបែក ៕