​ប្រណាំង​រថយន្ត៖ ​ជើងឯក Formula One ពិភពលោក ៧ សម័យ Lewis Hamilton បាន​និយាយថា ក្រុម​ប្រណាំង Mercedes របស់ខ្លួន​នឹងមិន​អាច​ប្រកួតប្រជែង​ក្នុង​លក្ខខណ្ឌ​ដណ្តើម​ជើងឯក​បានឡើយ ក្រោយពេល​បញ្ចប់​ការសាក​ល្បង​នៅ​បា​រ៉ែ​ន​។

​​កីឡាករ​វ័យ ៣៧ឆ្នាំ​រូបនេះ​បាន​លើក​បែបនេះ​ដោយ​បន្ថែមថា រថយន្ត​រដូវ​កាល​ថ្មី​នេះ​មានកំ​លាំង​ខ្លាំង តែ​ក៏​អាចនិយាយបាន​ថា​ មិន​ស្ថិតក្នុង​កំរិត​ប្រកួតប្រជែង​ជើងឯក​ដែរ ខណៈ​ការប្រកួត​នឹង​ចាប់ផ្តើម​រដូវ​កាល​ចុង​សប្តាហ៍​នេះ​គេ​សង្ឃឹមថា​ អ្វីៗ​នឹង​បានល្អ​ជាង​នេះ​។​ ​​ការធ្វើ​តេស្ត​សាកល្បង​ត្រៀម​រដូវ​កាល​ថ្មី​បានបញ្ចប់​ ក្រោយ​ដំណើរការ​ពេញ ១សប្តាហ៍​កន្លងទៅ ​ខណៈដែល​អ្នកការពារ​តំណែង​ជើងឯក​កីឡាករ​ហូ​ឡង់ Max Verstappen របស់​ក្រុម​ប្រណាំង Red Bull នៅតែ​ជា​អ្នកធ្វើ​បាន​លឿន​ជាងគេ​ ស្រប​ពេលដែល Hamilton នៅ​ឈរ​លេខ ៧ ឯណោះ​ក្នុងការ​សាកល្បង​ចុងក្រោយ​។

​​កីឡាករ​ម៉ូ​ណា​កូ Charles Leclerc របស់​ក្រុម Ferrari បានបញ្ចប់​ជាមួយ​ចំណាត់ថ្នាក់​លេខ ២, Fernando Alonso របស់​ក្រុម Alpine លេខ ៣ និង​កីឡាករ​អង់គ្លេស George Russell របស់​ក្រុម Mercedes លេខ ៤​។ ​​សូមបញ្ជាក់ថា ​រដូវ​កាល​ថ្មី Formula One ពិភពលោក ២០២២ នឹង​ចាប់ផ្តើម​ចុង​សប្តាហ៍​នេះហើយ ​ដោយ​ចេញដំណើរ​ពី​ទីលាន​ដំបូង​ប្រទេស​បា​រ៉ែ​ន​៕

​អត្ថបទ​៖​នាង សុភា​វុ​ធ