ប្រធានាធិបតីបារាំង លោក Emmanuel Macron បាននិយាយរួមជាមួយមេដឹកនាំប្រទេសដាណឺម៉ាក និងដែនដីស្វយ័តដាណឺម៉ាក កាលពីថ្ងៃពុធ ទី២៨ ខែមករា ថា ការប្រឈមមុខដាក់គ្នាជាមួយសហរដ្ឋអាមេរិកលើដែនដីហ្គ្រីនលែន គឺជា «សាររំលឹកជាយុទ្ធសាស្ត្រសម្រាប់អឺរ៉ុបទាំងមូល» ។

ប្រទេសមហាអំណាចអឺរ៉ុប បានស្វែងរកការរួមកម្លាំងគ្នាដើម្បីបង្ហាញថាពួកគេអាចឈរជើងដោយខ្លួនឯងបាន បន្ទាប់ពីប្រធានាធិបតីសហរដ្ឋអាមេរិក លោក Donald Trump បានធ្វើឲ្យរង្គោះរង្គើសម្ព័ន្ធមិត្តឆ្លងសមុទ្រអាត្លង់ទិក ដោយគំរាមយកដែនដី Greenland មកគ្រប់គ្រង។

ថ្លែងរួមគ្នាជាមួយនាយករដ្ឋមន្ត្រីប្រទេសដាណឺម៉ាក និងដែនដី Greenland លោកស្រី Mette Frederiksen និងលោក Jens-Frederik Nielsen លោកMacron បាននិយាយថា «សាររំលឹក» ត្រូវតែផ្តោតសំខាន់លើ «ការអះអាងពីដែនអធិបតេយ្យភាពអឺរ៉ុបរបស់យើង ការចូលរួមចំណែករបស់យើងចំពោះសន្តិសុខនៅតំបន់មហាសមុទ្រអាកទិក ការប្រយុទ្ធប្រឆាំងការជ្រៀតជ្រែកពីបរទេស ការផ្សព្វផ្សាយព័ត៌មានមិនពិត និងការប្រយុទ្ធប្រឆាំងការឡើងកម្តៅផែនដីសកល»។

លោកបានបញ្ជាក់ជាថ្មីចំពោះសាមគ្គីភាពរបស់លោកស្រី Frederiksen និងលោក Nielsen របស់ប្រទេសបារាំង និង «ការប្តេជ្ញាចិត្តរបស់ខ្លួនចំពោះអធិបតេយ្យភាព និងបូរណភាពទឹកដីរបស់អ្នកទាំងពីរ»។ លោកបាននិយាយបន្ថែមថា «បារាំង នឹងបន្តការពារគោលការណ៍ទាំងនេះស្របតាមធម្មនុញ្ញអង្គការសហប្រជាជាតិ» ដោយបង្ហាញពីការគាំទ្ររបស់លោកចំពោះការចូលរួមរបស់សម្ព័ន្ធយោធា NATO កាន់តែច្រើននៅក្នុងតំបន់មហាសមុទ្រអាកទិក។