តុលាការជាន់ខ្ពស់របស់ប្រទេសអ៊ីស្រាអែល បានពន្យារពេលការចេញសេចក្តីសម្រេចលើថាតើត្រូវអនុញ្ញាតឱ្យអ្នកសារព័ត៌មានបរទេសចូលយកព័ត៌មានដោយឯករាជ្យក្នុងតំបន់ហ្កាហ្សាឬមិនត្រូវអនុញ្ញាត ជាការពន្យារពេលចុងក្រោយនៃការតតាំងផ្លូវច្បាប់ដែលបានអូសបន្លាយពេលជាងមួយឆ្នាំមកហើយ។

សេចក្តីសម្រេចនេះ ពង្រីកគោលនយោបាយដែលបានហាមឃាត់អ្នកឆ្លើយឆ្លងព័ត៌មានបរទេសមិនឱ្យចូលទៅក្នុងតំបន់ហ្កាហ្សាដើម្បីរាយការណ៍អំពីស្ថានការណ៍នៅទីនោះ លុះត្រាតែអ្នកសារព័ត៌មានត្រៀមចូលរួមជាមួយកងទ័ពអ៊ីស្រាអែល។ នៅក្នុងសវនាការកាលពីថ្ងៃពុធ ចៅក្រមទំនងជាខកចិត្តចំពោះការពន្យល់របស់រដ្ឋាភិបាលសម្រាប់ការរក្សាបម្រាមទាំងស្រុងលើការចូលរបស់សារព័ត៌មានឯករាជ្យ ដែលនៅតែមានសុពលភាពចាប់តាំងពីអ៊ីស្រាអែលចាប់ផ្តើមសង្គ្រាមប្រល័យពូជសាសន៍លើប្រជាជនប៉ាឡេស្ទីនក្នុងតំបន់ហ្កាហ្សា បន្ទាប់ពីការវាយប្រហារដឹកនាំដោយក្រុមហាម៉ាសកាលពីថ្ងៃទី៧ ខែតុលា ឆ្នាំ២០២៣។

បទឈប់បាញ់បានចូលជាធរមាននៅក្នុងខែតុលា ឆ្នាំ២០២៥ ដោយអ៊ីស្រាអែលចាប់តាំងពីពេលនោះមកនៅតែបន្តវាយប្រហារដោយបានសម្លាប់មនុស្សជាង៤០០នាក់។

ចៅក្រម លោក Ruth Ronen បានច្រានចោលអំណះអំណាងរបស់រដ្ឋ ដោយទទូចថា «វាមិនគ្រប់គ្រាន់ទេក្នុងការលើកឡើងពី «ហានិភ័យសន្តិសុខ» ដោយមិនបានផ្តល់ព័ត៌មានលម្អិត ហើយបាននិយាយថាមាន «ការផ្លាស់ប្តូរដ៏សំខាន់នៅដែនដីនេះ» ចាប់តាំងពីបទឈប់បាញ់។

ក្រុមមេធាវីរបស់សមាគមសារព័ត៌មានបរទេស ត្រូវបានហាមឃាត់មិនឱ្យចូលរួម ឬដំណើរការសម្ភារៈដែលបានបង្ហាញដល់ចៅក្រម។ សមាគមសារព័ត៌មានបរទេស ដែលតំណាងឱ្យអ្នកសារព័ត៌មានចំនួន ៣៧០នាក់មកពីប្រព័ន្ធផ្សព្វផ្សាយចំនួន១៣០បាននិយាយថាសមាគម «មានការខកចិត្តយ៉ាងខ្លាំងដែលតុលាការជាន់ខ្ពស់អ៊ីស្រាអែល ពន្យារពេលសេចក្តីសម្រេចលើញត្តិរបស់យើងសម្រាប់ដំណើរការសារព័ត៌មានដោយសេរី និងឯករាជ្យទៅក្នុងតំបន់ហ្កាហ្សា»។