តម្លៃប្រេងបានមើលឃើញកំណើនអស់រយៈពេលបីថ្ងៃមកហើយ នៅថ្ងៃព្រហស្បតិ៍ (២៩ មករា) នេះ ដោយសារតែក្តីបារម្ភកាន់តែខ្លាំងឡើងថា សហរដ្ឋអាមេរិក អាចនឹងបើកការវាយប្រហារយោធាទៅលើប្រទេសផលិតប្រេងដ៏សំខាន់នៅមជ្ឈិមបូព៌ា គឺអ៊ីរ៉ង់ ដែលអាចរំខានដល់ការផ្គត់ផ្គង់ពីតំបន់នេះ។

សន្ទស្សន៍ប្រេងឆៅប្រភេទ Brent បានកើនឡើង ៥០សេន ឬ ០,៧៣% ដល់តម្លៃ ៦៨,៩ ដុល្លារក្នុងមួយបារ៉ែល គិតត្រឹមម៉ោងសកល GMT ០២:១៦ នាទីទាបភ្លឺថ្ងៃព្រហស្បតិ៍នេះ ខណៈប្រេងឆៅប្រភេទ WTI របស់សហរដ្ឋអាមេរិក បានកើនឡើង ៥៨ សេន ឬ ០,៩២% ដល់តម្លៃ ៦៣,៧៩ ដុល្លារក្នុងមួយបារ៉ែល។ សន្ទស្សន៍ទាំងពីរបានកើនឡើងប្រហែល ៥% គិតចាប់ពីថ្ងៃទី២៦ ខែមករា ហើយស្ថិតនៅកម្រិតខ្ពស់បំផុតចាប់តាំងពីថ្ងៃទី២៩ ខែកញ្ញា ឆ្នាំមុន។

តម្លៃប្រេងកំពុងកើនឡើង ខណៈដែលលោកប្រធានាធិបតីអាមេរិក Donald Trump បានបង្កើនសម្ពាធលើអ៊ីរ៉ង់ ឱ្យបញ្ចប់កម្មវិធីនុយក្លេអ៊ែររបស់ខ្លួន ជាមួយនឹងការគំរាមកំហែងវាយប្រហារដោយយោធា និងខណៈដែលក្រុមកងទ័ពជើងទឹកអាមេរិកមួយក្រុមធំបានទៅដល់តំបន់នោះរួចទៅហើយ។ អ៊ីរ៉ង់គឺជាប្រទេសផលិតប្រេងធំទី៤ ក្នុងចំណោមអង្គការនៃប្រទេសនាំចេញប្រេង OPEC ដោយមានទិន្នផលចំនួន ៣,២ លានបារ៉ែលក្នុងមួយថ្ងៃ។

ក្រុមអ្នកវិភាគនៅស្ថាប័ន Citi បាននិយាយក្នុងកំណត់ចំណាំមួយកាលពីថ្ងៃពុធថា «លទ្ធភាពដែលថា អ៊ីរ៉ង់ អាចរងការវាយប្រហារ បានធ្វើឱ្យតម្លៃប្រេងកើនឡើងពី ៣ ទៅ ៤ ដុល្លារ (ក្នុងមួយបារ៉ែល)»។ ក្រុមអ្នកវិភាគទីផ្សារបានបន្ថែមថា កំណើនភាពតានតឹងភូមិសាស្ត្រនយោបាយបន្ថែមទៀត អាចរុញឱ្យតម្លៃប្រេងប្រភេទ Brent ហក់ឡើងលើសពី ៧០ ដុល្លារក្នុងមួយបារ៉ែល៕