ប្រទេសបារាំង និយាយថាខ្លួនគាំទ្រការជំរុញរបស់សហភាពអឺរ៉ុបក្នុងការកំណត់ថាកងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ជា «អង្គការភេរវកម្ម» ដោយកែប្រែការជំទាស់កាលពីពេលមុនចំពោះចំណាត់ការនេះ។ នៅក្នុងសេចក្តីថ្លែងការណ៍មួយដែលបានចែករំលែកនៅលើបណ្តាញផ្សព្វផ្សាយសង្គមកាលពីថ្ងៃពុធ រដ្ឋមន្ត្រីការបរទេសបារាំង លោក Jean-Noel Barrot ទំនងជាភ្ជាប់ការកំណត់តាមផែនការទៅនឹងការបង្ក្រាបកាលពីពេលថ្មីៗនេះរបស់អាជ្ញាធរអ៊ីរ៉ង់លើការតវ៉ាប្រឆាំងរដ្ឋាភិបាលនៅទូទាំងប្រទេស។

លោក Barrot បានសរសេរនៅលើបណ្តាញ X ថា «ការបង្ក្រាបដែលមិនអាចទ្រាំទ្របាននៃការបះបោរដោយសន្តិវិធីរបស់ប្រជាជនអ៊ីរ៉ង់មិនអាចមិនឆ្លើយតបបានទេ។ ភាពក្លាហានដ៏អស្ចារ្យរបស់ពួកគេនៅចំពោះមុខអំពើហិង្សាដែលត្រូវបានធ្វើឡើងទៅលើពួកគេ មិនអាចមិនអើពើបានទេ»។

លោកនិយាយថា «ជាមួយដៃគូអឺរ៉ុបរបស់យើង យើងនឹងចាត់វិធានការនៅថ្ងៃទីក្រុងព្រុចសែលប្រឆាំងអ្នកទាំងឡាយដែលទទួលខុសត្រូវចំពោះអំពើដ៏ឃោរឃៅទាំងនេះ។ ពួកគេនឹងត្រូវបានហាមឃាត់មិនឱ្យចូលទឹកដីអឺរ៉ុប ហើយទ្រព្យសម្បត្តិរបស់ពួកគេនឹងត្រូវបានបង្កក»។ «បារាំង នឹងគាំទ្រការកំណត់កងកម្លាំងឆ្មាំបដិវត្តន៍អ៊ីស្លាមនៅក្នុងបញ្ជីអង្គការភេរវកម្មរបស់អឺរ៉ុប»។ រដ្ឋមន្ត្រីការបរទេសសហភាពអឺរ៉ុប កំពុងជួបប្រជុំគ្នានៅថ្ងៃព្រហស្បតិ៍នេះនៅទីក្រុងព្រុចសែល ជាកន្លែងដែលពួកគេត្រូវបានគេរំពឹងថានឹងចុះហត្ថលេខាលើទណ្ឌកម្មថ្មីប្រឆាំងកងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ផងដែរ។ ចំណាត់ការ ដែលដឹកនាំដោយប្រទេសអ៊ីតាលី ទំនងជានឹងត្រូវបានអនុម័តខាងនយោបាយ ទោះបីជាវាត្រូវការការឯកភាពគ្នាក្នុងចំណោមរដ្ឋជាសមាជិកទាំង ២៧ ប្រទេសរបស់ប្លុកអឺរ៉ុបក៏ដោយ។ កងកម្លាំងឆ្មាំបដិវត្តន៍អ៊ីស្លាមមអ៊ីរ៉ង់ ត្រូវបានបង្កើតឡើងបន្ទាប់ពីបដិវត្តន៍អ៊ីស្លាមឆ្នាំ ១៩៧៩ នៅក្នុងប្រទេសអ៊ីរ៉ង់ គឺជាសាខាមួយនៃយោធារបស់ប្រទេស ដែលឆ្លើយតបដោយផ្ទាល់ទៅនឹងមេដឹកនាំកំពូល លោក Ayatollah Ali Khamenei។