លោក Marco Rubio រដ្ឋមន្ត្រីការបរទេសសហរដ្ឋអាមេរិក បាននិយាយថា មេដឹកនាំថ្មីរបស់ប្រទេសវ៉េណេស៊ុយអេឡា កំពុងឆ្ពោះទៅរកទំនាក់ទំនងកាន់តែជិតស្និទ្ធជាមួយទីក្រុងវ៉ាស៊ីនតោន ដោយមិនបន្សល់ទុកនូវតម្រូវការបន្ទាន់សម្រាប់សកម្មភាពយោធាពីសហរដ្ឋអាមេរិក ទៀតនោះទេ។

ការលើកឡើងរបស់ប្រមុខការទូតរូបនេះជាការឆ្លើយតបជាសាធារណៈទៅនឹងសំណួររបស់សមាជិកសភា កាលពីថ្ងៃពុធ (២៨ មករា) ជាលើកដំបូងបំផុត ចាប់តាំងពីការចាប់ខ្លួនលោកប្រធានាធិបតី Nicolas Maduro កាលពីដើមខែមករានេះ។

លោកប្រធានាធិបតីអាមេរិក Donald Trump បានបញ្ជាឱ្យរដ្ឋបាលរបស់លោក ធ្វើការជាមួយសម្ព័ន្ធមិត្តរបស់លោក Maduro គឺលោកស្រី Delcy Rodriguez ដែលបានស្បថចូលកាន់តំណែងជាប្រធានាធិបតីបណ្តោះអាសន្ន បន្ទាប់ពីការចាប់ខ្លួនលោក Maduro ប៉ុន្តែកាលពីមុន លោក Trump បានព្រមានអំពីសកម្មភាពយោធាបន្ថែមទៀត ប្រសិនបើរដ្ឋាភិបាលរបស់លោកស្រី មិនគោរពតាមការទាមទាររបស់សហរដ្ឋអាមេរិក។

ថ្លែងប្រាប់បន្ទប់សវនាការព្រឹទ្ធសភា លោក Rubio បាននិយាយថា លោក Trump នឹងមិនច្រានចោលជម្រើសណាមួយឡើយ "ប៉ុន្តែរដ្ឋបាលមិនមានជំហរ ហើយក៏មិនមានបំណង ឬរំពឹងថា នឹងត្រូវចាត់វិធានការយោធាណាមួយនៅក្នុងប្រទេសវ៉េណេស៊ុយអេឡានោះដែរ" ដែលបង្ហាញពីវឌ្ឍនភាពនៃការពេញចិត្តរបស់រដ្ឋបាលអាមេរិក ជាមួយលោកស្រី Rodriguez។

ប្រមុខការទូតរូបនេះបន្តថា ការទំនាក់ទំនងជាមួយមេដឹកនាំរបស់វ៉េណេស៊ុយអេឡា គឺ "មានការគោរព និងមានផលិតភាពខ្ពស់" ដោយបន្ថែមថា លោករំពឹងថា សហរដ្ឋអាមេរិកនឹងអាចបើកវត្តមានការទូតឡើងវិញនៅក្នុងប្រទេសនេះក្នុងពេលឆាប់ៗនេះ។ គួរឱ្យដឹងថា ស្ថានទូតសហរដ្ឋអាមេរិក នៅទីក្រុងការ៉ាកាស ត្រូវបានបិទចាប់តាំងពីឆ្នាំ២០១៩ មក ប៉ុន្តែក្រសួងការបរទេសអាមេរិក ក្នុងប៉ុន្មានសប្តាហ៍ថ្មីៗនេះ បានបញ្ជូនមន្ត្រីឱ្យចាប់ផ្តើមរៀបចំសម្រាប់ការបើកដំណើរការស្ថានទូតឡើងវិញ៕