ប្រទេសចំនួន ១១ បានថ្កោលទោសការរុះរើរបស់អ៊ីស្រាអែលនូវទីស្នាក់ការកណ្តាលរបស់ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន(UNRWA)នៅទីក្រុងហ្ស៊េរុយសាឡឹមខាងកើត ដោយនិយាយថាវា«បង្ហាញពីចំណាត់ការដែលមិនអាចទទួលយកបានចុងក្រោយបំផុតនេះក្នុងការបំផ្លាញ» ការងាររបស់ទីភ្នាក់ងារ UNRWA។

នៅក្នុងសេចក្តីថ្លែងការណ៍រួមមួយកាលពីថ្ងៃពុធ រដ្ឋមន្ត្រីការបរទេសនៃប្រទេសបែលហ្ស៊ិក កាណាដា ដាណឺម៉ាក បារាំង អ៊ីស្លង់ អៀរឡង់ ជប៉ុន ន័រវែស ព័រទុយហ្គាល់ អេស្ប៉ាញ និងចក្រភពអង់គ្លេស បានរិះគន់ការរុះរើនេះថាជា «ទង្វើដែលមិនធ្លាប់មានពីមុនមក» ប្រឆាំងនឹងទីភ្នាក់ងារអង្គការសហប្រជាជាតិ។

ពួកគេបាននិយាយថា «យើងអំពាវនាវដល់រដ្ឋាភិបាលអ៊ីស្រាអែល ដែលជាសមាជិកនៃអង្គការសហប្រជាជាតិ ឱ្យបញ្ឈប់ការរុះរើទាំងអស់»។ អ៊ីស្រាអែល បានធ្វើយុទ្ធនាការដាក់សម្ពាធកាន់តែខ្លាំងឡើងលើទីភ្នាក់ងារ UNRWA ដែលផ្តល់ជំនួយនិងសេវានានាដល់ជនភៀសខ្លួនប៉ាឡេស្ទីននៅទូទាំងតំបន់មជ្ឈិមបូព៌ា ក្នុងពេលមានសង្គ្រាមប្រល័យពូជសាសន៍របស់ប្រទេសនេះប្រឆាំងពលរដ្ឋប៉ាឡេស្ទីននៅក្នុងតំបន់ហ្កាហ្សា។ ដោយគ្មានភស្តុតាងជាក់ស្តែង រដ្ឋាភិបាលអ៊ីស្រាអែលនិងសម្ព័ន្ធមិត្តរបស់ខ្លួន រួមមានទាំងសហរដ្ឋអាមេរិក បានចោទប្រកាន់ទីភ្នាក់ងារ UNRWA ថាមានទំនាក់ទំនងជាមួយក្រុមហាម៉ាស ជាការអះអាងដែលត្រូវបានច្រានចោលដោយអង្គការសហប្រជាជាតិ។ អ៊ីស្រាអែល បានប្រើប្រាស់ការចោទប្រកាន់ទាំងនេះដើម្បីព្យាយាមរឹតត្បិតសមត្ថភាពរបស់ទីភ្នាក់ងារ UNRWA ក្នុងការធ្វើប្រតិបត្តិការនៅក្នុងតំបន់ហ្កាហ្សា ទោះបីជាមេដឹកនាំមនុស្សធម៌បាននិយាយថាទីភ្នាក់ងារនេះរៀបចំយ៉ាងល្អបំផុតក្នុងការចែកចាយអាហារ ទឹក ថ្នាំពេទ្យ និងជំនួយមនុស្សធម៌សំខាន់ៗផ្សេងទៀតនៅក្នុងតំបន់ហ៊ុមព័ទ្ធដែលរងការបំផ្លិចបំផ្លាញដោយសង្គ្រាម ក៏ដោយ។