ប្រធានាធិបតីអាមេរិក លោក Donald Trump បានព្រមានអភិបាលក្រុង Minneapolis លោក Jacob Frey កាលពីថ្ងៃពុធ (២៨ មករា) ថា អភិបាលក្រុងរូបនេះកំពុងតែ «ប្រលែងលេងជាមួយភ្លើងហើយ» ដោយសារតែការទទូចថា នគរបាលមូលដ្ឋាននឹងមិនអនុវត្តច្បាប់អន្តោប្រវេសន៍សហព័ន្ធនោះទេ រយៈពេលមួយថ្ងៃប៉ុណ្ណោះបន្ទាប់ពីប្រធានាធិបតីរូបនេះបង្ហាញពីបំណង «បន្ធូរបន្ថយភាពតានតឹងបន្តិចបន្តួច» នៅក្នុងទីក្រុងនេះ។

ស្របពេលសញ្ញាមិនទៀតទាត់ពីសេតវិមាន ភាពតានតឹងនៅតែខ្ពស់ខ្លាំងនៅក្នុងទីក្រុង Minneapolis ជាទីដែលអ្នកសង្កេតការណ៍ និងសកម្មជនបាននិយាយថា ការឆ្មក់បង្រ្កាបដើម្បីនិរទេសជនអន្តោប្រវេសន៍ ដែលធ្វើឡើងដោយយុទ្ធនាការអន្តោប្រវេសន៍របស់លោក Trump មិនបានថមថយទេ ប៉ុន្តែហាក់ដូចជាដាក់គោលដៅខ្លាំងជាងមុនទៅទៀត។

ត្រឹមតែមួយថ្ងៃប៉ុណ្ណោះបន្ទាប់ពីបង្ហាញវោហាសាស្រ្តបែបផ្សះផ្សា លោក Trump បានបង្ហោះសារលើបណ្តាញសង្គមនៅថ្ងៃពុធ ដោយស្តីបន្ទោសលោក Frey ចំពោះការបញ្ជាក់ជាថ្មីពីជំហររបស់ថ្នាក់ដឹកនាំក្នុងតំបន់ ដែលថា ទីក្រុងនេះនឹងមិនអនុវត្តច្បាប់អន្តោប្រវេសន៍។ លោក Trump បានសរសេរថា៖ «ចូរអ្នកផ្ទៃក្នុងពន្យល់ប្រាប់លោក Frey ផងថា សេចក្តីថ្លែងការណ៍នេះគឺជាការរំលោភច្បាប់យ៉ាងធ្ងន់ធ្ងរ ហើយថា លោក Frey កំពុងតែប្រលែងលេងជាមួយភ្លើងហើយ!»។

ជាការឆ្លើយតប លោក Frey បានសរសេរលើបណ្តាញសង្គមថា «ការងាររបស់នគរបាលក្រុងគឺរក្សាសុវត្ថិភាពជូនប្រជាជន មិនមែនអនុវត្តច្បាប់អន្តោប្រវេសន៍របស់សហព័ន្ធនោះទេ»។ សង្រ្គាមពាក្យសម្ដីជាថ្មីនេះ បានកើតឡើងស្របពេលទីក្រុង Minneapolis ត្រូវបានរង្គោះរង្គើដោយការប្រឈមមុខដាក់គ្នារវាងក្រុមបាតុករ និងភ្នាក់ងារអន្តោប្រវេសន៍ ហើយបាតុកម្មបានរីករាលដាលដល់ទីក្រុងធំៗ និងតូចៗទូទាំងសហរដ្ឋអាមេរិក ក្នុងប៉ុន្មានសប្តាហ៍ថ្មីៗនេះ៕