ប្រជាជនអ៊ីរ៉ាក់រាប់រយនាក់ បានធ្វើបាតុកម្មនៅជិតតំបន់បៃតង ដែលមានកំពែងដ៏រឹងមាំនៅកណ្តាលទីក្រុងបាកដាដ កាលពីល្ងាចថ្ងៃពុធ ដោយប្រឆាំងនឹងការជ្រៀតជ្រែករបស់សហរដ្ឋអាមេរិកក្នុងកិច្ចការផ្ទៃក្នុងរបស់ប្រទេសនេះ ទៅលើការបង្កើតរដ្ឋាភិបាលថ្មី។

ក្រុមអ្នកតវ៉ា បានប្រមូលផ្តុំគ្នានៅជិតស្ពានយោលនៅជិតច្រកចូលផ្លូវមួយ ដែលនាំទៅដល់ស្ថានទូតអាមេរិក ដោយស្រែកពាក្យស្លោកប្រឆាំងនឹងសហរដ្ឋអាមេរិក ខណៈពេលដែលទាមទារឲ្យរក្សាអធិបតេយ្យភាពរបស់ប្រទេសអ៊ីរ៉ាក់។

ការជួបជុំគ្នាភាគច្រើន ត្រូវបានធ្វើឡើងដោយសន្តិវិធី ទោះបីជាមានការប៉ះទង្គិចគ្នាខ្លះ បានកើតឡើងជាមួយកងកម្លាំងសន្តិសុខ ដែលរារាំងក្រុមអ្នកតវ៉ាមិនឲ្យចូលទៅជិតច្រកចូលស្ថានទូតអាមេរិកក៏ដោយ។ ពុំមានរបាយការណ៍អំពីអ្នករងរបួសឡើយ។

លោក Abbas Attiwi ដែលជាអ្នកតវ៉ាម្នាក់ បានប្រាប់សារព័ត៌មានស៊ីនហួថា៖«យើងបដិសេធរាល់ទម្រង់នៃការជ្រៀតជ្រែកពីបរទេសក្នុងការសម្រេចចិត្តរបស់ប្រជាជនអ៊ីរ៉ាក់ទៅលើការកសាងអនាគតរបស់ពួកគេ»។ លោកបានរិះគន់ជាពិសេសចំពោះសម្ពាធរបស់សហរដ្ឋអាមេរិកទាក់ទងនឹងការបង្កើតរដ្ឋាភិបាលថ្មីរបស់អ៊ីរ៉ាក់ ដោយហៅវាថា ជា«ការជ្រៀតជ្រែកដោយចំហ» នៅក្នុងកិច្ចការផ្ទៃក្នុងរបស់ប្រទេសនេះ។

ការតវ៉ានេះ ត្រូវបានបង្កឡើង ដោយការកើនឡើងយ៉ាងខ្លាំងនូវវោហាសាស្ត្ររវាងទីក្រុងវ៉ាស៊ីនតោន និងទីក្រុងបាកដាដ។ ប្រធានាធិបតីអាមេរិក លោក ដូណាល់ ត្រាំ បានគំរាមកាលពីថ្ងៃអង្គារថា សហរដ្ឋអាមេរិកនឹង «លែងជួយអ៊ីរ៉ាក់ទៀតហើយ» ប្រសិនបើអតីតនាយករដ្ឋមន្ត្រីអ៊ីរ៉ាក់ លោក Nouri al-Maliki វិលត្រឡប់មកកាន់អំណាចវិញ ដោយលើកឡើងពីការព្រួយបារម្ភអំពីគោលនយោបាយ និងមនោគមវិជ្ជាពីមុនរបស់លោក។

លោក Al-Maliki កាលពីថ្ងៃពុធ បានច្រានចោល«ការជ្រៀតជ្រែកយ៉ាងច្បាស់លាស់របស់សហរដ្ឋអាមេរិក» ក្នុងកិច្ចការផ្ទៃក្នុងរបស់អ៊ីរ៉ាក់ ដោយពណ៌នាថា នេះគឺជាការរំលោភលើអធិបតេយ្យភាពអ៊ីរ៉ាក់ និងប្រព័ន្ធប្រជាធិបតេយ្យ ដែលបានបង្កើតឡើងនៅក្នុងប្រទេសអ៊ីរ៉ាក់ បន្ទាប់ពីឆ្នាំ ២០០៣ និងការរំលោភលើការសម្រេចចិត្តរបស់ក្របខ័ណ្ឌសម្របសម្រួល (CF) ក្នុងការជ្រើសរើសបេក្ខជនរបស់ខ្លួនសម្រាប់តំណែងនាយករដ្ឋមន្ត្រី៕