រដ្ឋមន្ត្រីការបរទេស លោក Marco Rubio បាននិយាយថា សហរដ្ឋអាមេរិកសង្ឃឹមថា នឹងប្រែក្លាយប្រទេសវ៉េណេស៊ុយអេឡាទៅជា «សម្ព័ន្ធមិត្តដ៏រឹងមាំ» របស់ខ្លួន។

លោកបានថ្លែងនៅក្នុងសវនាការរបស់គណៈកម្មាធិការទំនាក់ទំនងការបរទេសព្រឹទ្ធសភាថា៖«នៅទីបញ្ចប់ យើងកំពុងនិយាយអំពីប្រទេសលោកខាងលិចដែលមានប្រវត្តិយូរអង្វែងនៃកិច្ចសហប្រតិបត្តិការ និងធ្វើការជាមួយសហរដ្ឋអាមេរិក។ កាលពីពេលមួយ ប្រទេសវ៉េណេស៊ុយអេឡាមុនសម័យលោក Chavez គឺជាសម្ព័ន្ធមិត្តដ៏រឹងមាំរបស់សហរដ្ឋអាមេរិក ហើយយើងសង្ឃឹមថា នឹងវិលត្រឡប់ទៅចំណុចនោះវិញ»។ 

នៅថ្ងៃទី ០៣ ខែមករា រដ្ឋមន្ត្រីការបរទេសវ៉ណេស៊ុយអេឡា លោក Ivan Gil Pinto បាននិយាយថា សហរដ្ឋអាមេរិក បានវាយប្រហារទីតាំងស៊ីវិល និងយោធា នៅទីក្រុងការ៉ាកាស។ លោកបានហៅសកម្មភាពរបស់ទីក្រុងវ៉ាស៊ីនតោនថា ជាការឈ្លានពានដោយយោធា។ ស្ថានភាពគ្រាអាសន្ន ត្រូវបានប្រកាស នៅក្នុងប្រទេសនេះ។

គួរបញ្ជាក់ផងដែរ នៅថ្ងៃទី ០៣ ខែមករា សហរដ្ឋអាមេរិក បានវាយប្រហារទីតាំងស៊ីវិល និងយោធា នៅទីក្រុងការ៉ាកាស ចាប់ខ្លួនលោកប្រធានាធិបតី នីកូឡា ម៉ាឌូរ៉ូ ( Nicolas Maduro) និងភរិយារបស់លោក ហើយនាំខ្លួនពួកគេទៅសហរដ្ឋអាមេរិក។

នៅថ្ងៃទី ០៥ ខែមករា ពួកគេបានបង្ហាញខ្លួននៅចំពោះមុខតុលាការសហព័ន្ធសម្រាប់សង្កាត់ភាគខាងត្បូងនៃទីក្រុងញូវយ៉ក ត្រូវបានចោទប្រកាន់ពីបទពាក់ព័ន្ធនឹងការជួញដូរគ្រឿងញៀន ហើយបានសារភាពថាមិនមានទោស។

លោកស្រី Delcy Rodriguez ដែលធ្លាប់បម្រើការជាអនុប្រធានាធិបតីប្រតិបត្តិ ក្រោមការដឹកនាំរបស់លោក ម៉ាឌូរ៉ូ បានឡើងកាន់តំណែងជំនួសលោកក្នុងនាមជាប្រមុខរដ្ឋ។ ប្រធានាធិបតីអាមេរិក លោក ដូណាល់ ត្រាំ បាននិយាយថា សហរដ្ឋអាមេរិកនឹង «គ្រប់គ្រង» ប្រទេសវ៉េណេស៊ុយអេឡាជាបណ្តោះអាសន្ន ហើយបានសន្យាថា នឹងស្វែងរកសំណងពីទីក្រុងការ៉ាកាសសម្រាប់ក្រុមហ៊ុនប្រេងអាមេរិក ខណៈដែលក្រុមហ៊ុនទាំងនេះ នឹងបែងចែកថវិកាដើម្បីស្តារហេដ្ឋារចនាសម្ព័ន្ធប្រេងរបស់ប្រទេសនេះឡើងវិញ៕