កីឡាជាតិ៖ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានធ្វើការណែនាំដល់គណៈកម្មការជំនាញ និងគ្រប់ភាគីពាក់ព័ន្ធទាំងអស់ត្រូវត្រៀមលក្ខណៈឲ្យបានល្អប្រសើរ ក្នុងការត្រៀមរៀបចំការប្រកួតកីឡាជាតិលើកទី៣ នាចុងឆ្នាំ២០២២ នេះដែលនឹងត្រូវរៀបចំតាមទម្រង់ស៊ីហ្គេម ដើម្បីជាបទពិសោធន៍ក្នុងការត្រៀមធ្វើម្ចាស់ផ្ទះព្រឹត្តិការណ៍ជាប្រវត្តិសាស្ដ្រលើកដំបូងនាឆ្នាំ២០២៣។
ការគូសបញ្ជាក់បែបនេះធ្វើឡើងក្នុងកិច្ចប្រជុំតាមប្រព័ន្ធអនឡាញ ស្ដីពីការៀបចំការប្រកួតកីឡាជាតិលើកទី៣ ដែលគ្រោងរៀបចំពីថ្ងៃទី១៧ ដល់ថ្ងៃទី២៨ ខែវិច្ឆិកា ឆ្នាំ២០២២ កាលពីល្ងាចថ្ងៃទី១៤ ខែមីនាម្សិលមិញ ដោយមានការចូលរួមពីមន្ដ្រីជាន់ខ្ពស់ និងអង្គភាពជំនាញជាច្រើនដែលស្ថិតក្រោមឱវាទក្រសួងអប់រំ យុវជន និងកីឡា។ ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ការប្រកួតកីឡាជាតិបានរៀបចំ ២លើករួចមកហើយកាលពីឆ្នាំ២០១៦ និងឆ្នាំ២០១៨ ខណៈការប្រកួតលើកទី៣ ដែលគ្រោងរៀបចំនៅឆ្នាំ២០២០ ត្រូវបានពន្យាពេលរហូតដល់ឆ្នាំ២០២២ ទើបក្រសួងអប់រំ យុវជន និងកីឡាសម្រេចរៀបចំព្រឹត្តិការណ៍ដ៏ធំនេះឡើងវិញ ដើម្បីត្រៀមលក្ខណៈឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។ តាមរយៈនេះ ឯកឧត្តមរដ្ឋមន្ត្រីបានណែនាំឲ្យរៀបចំគណៈកម្មការជំនាញនានា អ្នកស្ម័គ្រចិត្តឲ្យមានវិជ្ជាជីវៈ និងត្រូវធ្វើកិច្ចសហការជាមួយគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) និងសហព័ន្ធកីឡាជាតិដោយរៀបចំតាមទម្រង់ស៊ីហ្គេម ដើម្បីសម្រួចគោលដៅឆ្ពោះទៅឆ្នាំ២០២៣ ក៏ដូចជាការរៀបចំត្រូវអនុវត្តឲ្យបានខ្ជាប់ខ្ជួនតាមវិធានការសុខាភិបាល ពិសេសវិធានការ ៣កុំ និង ៣ការពារតែម្ដង។
ថ្លែងក្នុងកិច្ចប្រជុំនោះដែរ ឯកឧត្តម អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាបានបញ្ជាក់ថា កន្លងមកឯកឧត្តមបានបើកកិច្ចប្រជុំ និងពិភាក្សាជាមួយអង្គភាពជំនាញជាជំហានៗរួចមកហើយ ដោយគិតគូទៅលើការរៀបចំ ហូបចុក ស្នាក់នៅ និងទំហំនៃចំនួនប្រតិភូ កីឡាករ កីឡាការិនីតាមបណ្តារាជធានី-ខេត្តក្នុងការគ្រប់គ្រងលើបញ្ហាកូវីដ-១៩ ហើយនឹងឈានទៅជជែងពិភាក្សាជាមួយគណៈកម្មាធិការជាតិ CAMSOC គណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិជាជំហានបន្តបន្ទាប់ទៀត ដើម្បីសម្រួចលក្ខណៈបច្ចេកទេសឆ្ពោះទៅរៀបចំការប្រកួតកីឡាជាតិ ដែលជាព្រឹត្តិការណ៍ដ៏សំខាន់មុនការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នេះ។ តាមគម្រោងការប្រកួតកីឡាជាតិលើកទី៣ នឹងរៀបចំការប្រកួតនៅទីលាន ៦រាជធានី-ខេត្ត ពិសេសទីតាំងពហុកីឡដ្ឋានជាតិមរតកតេជោ ដែលជាកន្លែងប្រារព្ធពិធីបើក-បិទព្រឹត្តិការណ៍ស៊ីហ្គេមឆ្នាំ២០២៣ ហើយមានប្រតិភូ គ្រូបង្វឹក កីឡាករ-កីឡាការិនី និងគណៈកម្មការចូលរួមប្រមាណ ៧,០០០នាក់។ ចំពោះប្រភេទកីឡាដែលគ្រោងរៀបចំក្នុងព្រឹត្តិការណ៍ដ៏មានសារៈសំខាន់នេះគឺមាន ៣៩ប្រភេទកីឡា និងកីឡាប៉ារ៉ាឡាំពិក ៧ប្រភេទកីឡា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
