យោងតាមអាជ្ញាធរនៅទីក្រុង Bogota បានឲ្យដឹងថា យន្តហោះដែលមានម៉ាស៊ីន ២ ដែលដឹកមនុស្ស ១៥នាក់ ក្នុងនោះរួមមានទាំងសមាជិកសភាកូឡុំប៊ីម្នាក់ដែរ បានធ្លាក់កាលពីថ្ងៃពុធ (ទី២៨ ខែមករា ឆ្នាំ២០២៦) នៅតំបន់ភ្នំមួយក្បែរព្រំដែនវ៉េណេស៊ុយអេឡា ដោយបានបណ្ដាលឲ្យអ្នកដំណើរ និងអាកាសយានិកស្លាប់ទាំងអស់។

យន្តហោះនោះបានហោះចេញពីទីក្រុងព្រំដែនកូឡុំប៊ី Cucuta ហើយបានដាច់ការទាក់ទងភ្លាមៗ ជាមួយបណ្ដាញគ្រប់គ្រងចរាចរណ៍ផ្លូវអាកាស មុនពេលវាគ្រោងចុះចតនៅទីក្រុង Ocana ក្បែរនោះ នៅវេលាប្រហែលថ្ងៃត្រង់ (ត្រូវនឹងម៉ោង ១៧:០០ ម៉ោងសកល)។

មានអ្នកដំណើរ ១៣នាក់ និងបុគ្គលិក ២នាក់នៅលើយន្តហោះនោះ ដែលគ្រោងនឹងចំណាយពេល ២៣នាទី ដើម្បីហោះហើរទៅដល់គោលដៅ និងដែលត្រូវបានដំណើរការដោយក្រុមហ៊ុនអាកាសចរណ៍រដ្ឋកូឡុំប៊ី Satena។

មន្ត្រីម្នាក់មកពីអាជ្ញាធរអាកាសចរណ៍ បានប្រាប់សារព័ត៌មាន AFP ថា «គ្មានអ្នកនៅរស់រានមានជីវិតនោះទេ»។ មូលហេតុនាំឲ្យមានការធ្លាក់នេះ មិនទាន់ត្រូវបានគេដឹងភ្លាមៗនៅឡើយទេ។

រដ្ឋាភិបាលបានដាក់ពង្រាយកងទ័ពអាកាស ដើម្បីរុករកតំបន់នោះ ជាតំបន់មានសណ្ឋានដីរដិបរដុប និងគ្របដណ្តប់យ៉ាងក្រាស់ដោយជួរភ្នំ Andes ភាគខាងកើតដែលមានអាកាសធាតុប្រែប្រួលខ្លាំង។

នៅក្នុងចំណោមបញ្ជីអ្នកស្លាប់នោះ ក៏រួមមានលោក Diogenes Quintero អាយុ ៣៦ឆ្នាំ ដែលជាសមាជិកសភាតំណាងរាស្រ្តកូឡុំប៊ី និងលោក Carlos Salcedo ដែលជាបេក្ខជន សម្រាប់ការបោះឆ្នោតនាពេលខាងមុខ៕