អធិការបតីអាល្លឺម៉ង់ លោក Friedrich Merz នៅថ្ងៃព្រហស្បតិ៍ (ទី២៩ ខែមករា ឆ្នាំ២០២៦) បាននិយាយថា គោលដៅនៃសណ្តាប់ធ្នាប់សកលដែលផ្អែកលើច្បាប់ មិនទាន់ដួលរលំនៅឡើយទេ ដោយអំពាវនាវឲ្យមាននូវអង្គការណាតូ (NATO) ដ៏រឹងមាំមួយ នៅក្នុងទ្វីបអឺរ៉ុប ខណៈដែលនៅតែពង្រីកកិច្ចសហប្រតិបត្តិការជាមួយសហរដ្ឋអាមេរិក។

អំឡុងពេលថ្លែងទៅកាន់សភាអាល្លឺម៉ង់ លោក Merz ក៏បានលើកឡើងផងដែរថា អឺរ៉ុបនឹងលែងភ័យខ្លាច អំពីការគំរាមកំហែងដំឡើងពន្ធទៀតហើយ បន្ទាប់ពីប្រធានាធិបតីអាមេរិក លោក Donald Trump បានដកការប្រើប្រាស់វិធានការបែបនេះជាអាវុធ ដើម្បីដណ្តើមកាន់កាប់ដែនដី Greenland។

សុន្ទរកថារបស់លោក Merz បានគូសបញ្ជាក់ថា តើបណ្ដាមេដឹកនាំអឺរ៉ុប ត្រូវបានជំរុញយ៉ាងដូចម្ដេច ដើម្បីឲ្យព្យាយាមបង្ហាញពីកម្លាំង និងតម្លៃរបស់អឺរ៉ុប បន្ទាប់ពីមានការប្រឈមមុខដាក់គ្នាជាមួយលោក Trump ជុំវិញបញ្ហាកោះ Greenland និងសង្គ្រាមជិត ៤ឆ្នាំ រវាងរុស្ស៊ី និងអ៊ុយក្រែន។

លោក Merz បានប្រាប់សមាជិកសភាថា៖ «អស់រយៈពេលជាច្រើនសប្តាហ៍មកហើយ យើងបានឃើញយ៉ាងច្បាស់លាស់កាន់តែខ្លាំងឡើង អំពីការលេចឡើងនូវមហាអំណាចពិភពលោកដ៏ច្រើន។ ព្យុះភ្លៀងដ៏ខ្លាំងក្លាកំពុងបក់បោកនៅក្នុងពិភពលោកនេះ ហើយយើងនឹងមានអារម្មណ៍ដឹងពីផលប៉ះពាល់របស់វា ចំពោះអនាគតដែលអាចមើលឃើញទុកជាមុន»។

លោកបានលើកឡើងទៀតថា ក្នុងរយៈពេលប៉ុន្មានសប្តាហ៍ថ្មីៗនេះ «យើងអាចមាននូវអារម្មណ៍ទទួលបាននូវការគោរពខ្លួនឯង» ហើយលោកពោលបន្ថែម ដោយសង្កត់ធ្ងន់ថា សកម្មភាពផ្អែកលើច្បាប់ និងពាណិជ្ជកម្មផ្អែកលើច្បាប់ មិនទាន់បាត់បង់នៅឡើយទេ៕