ប៉េតង់៖ លោក ពៅ វណ្ណា ប្រធានការិយាល័យអប់រំ យុវជន និងកីឡានៃមន្ទីរអប់រំ យុវជន និងកីឡាខេត្តកណ្តាលបានជំរុញឲ្យសមាគម/ក្លិបកីឡាប៉េតង់បង្កើនការយកចិត្តទុកដាក់ និងជំរុញការអភិវឌ្ឍធនធានកីឡាករយុវជនថ្នាល សម្រាប់ត្រៀមការប្រកួតថ្នាក់ជាតិនានា ពិសេសការប្រកួតកីឡាជាតិលើកទី៣ នាចុងឆ្នាំ២០២២ នេះ។
ការលើកឡើងនេះបន្ទាប់ពីមន្ទីរអប់រំ យុវជន និងកីឡាខេត្តកណ្ដាលបានរៀបចំការប្រកួតជើងឯកកីឡាប៉េតង់វ័យចាស់ និងយុវជនថ្នាក់ខេត្តប្រចាំឆ្នាំ២០២២ ក្រោយទទួលបានការចង្អុលបង្ហាញពីឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល និងបញ្ចប់ដោយជោគជ័យ ក្រោយដំណើរការប្រកួត ៤ថ្ងៃកាលពីចុងសប្ដាហ៍កន្លងទៅ។
បន្ទាប់ពីរកឃើញក្រុមជ័យលាភីប្រចាំឆ្នាំ លោក ពៅ វណ្ណា បានសង្កត់ធ្ងន់ឲ្យសមាគម/ក្លិបត្រូវផ្ដោតការយកចិត្តទុកដាក់បន្ថែម លើការដុះខាតសមត្ថភាពកីឡាករយុវជន ដើម្បីចម្រាញ់រកកីឡាករឆ្នើមតំណាងខេត្តត្រៀមចូលរួមការប្រកួតថ្នាក់ជាតិនានា ដែលរៀបចំដោយសហព័ន្ធ ពិសេសការប្រកួតកីឡាជាតិលើកទី៣ ដើម្បីប្រជែងមេដាយ និងកិត្តិយសជូនខេត្ត។ ចំពោះធនធានកីឡាករវ័យចាស់វិញ ក៏ត្រូវបានលោកលើកទឹកចិត្តឲ្យខំប្រឹងប្រែងហ្វឹកហាត់ផងដែរ ដើម្បីទទួលបានសុខភាពល្អ ពិសេសត្រៀមចូលរួមប្រកួតពានរង្វាន់វ័យចាស់ ដែលរៀបចំដោយសមាគមផ្សេងៗ ក៏ដូចជាការត្រៀមប្រកួតលក្ខណៈមិត្តភាព ជាមួយសមាគម/ក្លិបតាមបណ្ដារាជធានី-ខេត្តនានា ក្នុងន័យរួមចំណែកអភិវឌ្ឍន៍វិស័យកីឡាប៉េតង់កម្ពុជាឲ្យកាន់តែរីកចម្រើនផងដែរ។
គួរបញ្ជាក់ថា ព្រឹត្តិការណ៍ប្រចាំឆ្នាំនេះគឺមាន ១៨ក្រុមចូលរួមដែលប្រកួតលើ ៤វិញ្ញាសា។ ជាលទ្ធផលវិញ្ញាសាយុវជន ២នាក់ទល់ ២នាក់ លេខ១ បានទៅក្រុមសេរីភាពពីរ លេខ២ ក្រុមសុវណ្ណភូមិ និងលេខ៣ ស្ទួន មានក្រុមកំពង់សំណាញ់មួយ និងកំពង់សំណាញ់ពីរ។ រីឯវិញ្ញាសាវ័យចាស ២នាក់ទល់ ២នាក់ លេខ១ សមាគមខេត្តកណ្ដាលមួយ, លេខ២ ក្រុមកំពង់សំណាញ់មួយ និងលេខ៣ ស្ទួនមានក្រុមកំពង់សំណាញ់២ និងក្រុមវេសលែនដ៏។ ដោយឡែកវិញ្ញាសាយុវជន ៣នាក់ទល់ ៣នាក់ លេខ១ ក្រុមសេរីភាពពីរ លេខ២ ក្រុមកំពង់សំណាញ់មួយ និងលេខ៣ ស្ទួន មានក្រុមវិទ្យាល័យតាខ្មៅ និងក្រុមកំពង់សំណាញ់ពីរ។ ចំណែកវិញ្ញាសាវ័យចាស់ ៣នាក់ទល់ ៣នាក់ លេខ១ សមាគមខេត្តកណ្ដាលមួយ លេខ២ សមាគមខេត្តកណ្ដាលពីរ និងលេខ៣ ស្ទួនមានមន្ទីរអប់រំ យុវជន និងកីឡាខេត្តកណ្ដាល និងក្រុមកំពង់សំណាញ់ពីរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
