អ្នកការទូតជាន់ខ្ពស់របស់សហភាពអឺរ៉ុប (EU) លោកស្រី Kaja Kallas នៅថ្ងៃព្រហស្បតិ៍ (ទី២៩ ខែមករា ឆ្នាំ២០២៦) នេះ បានព្រមានថា ប្រទេសអ៊ុយក្រែនកំពុងប្រឈមនឹង «គ្រោះមហន្តរាយមនុស្សធម៌» ខណៈដែលការវាយប្រហាររបស់រុស្ស៊ី បានកាត់ផ្តាច់ថាមពល អំឡុងរដូវរងាដ៏សែនត្រជាក់។

លោកស្រី Kallas បាននិយាយថា ទោះបីជាមានការចរចាដឹកនាំដោយសហរដ្ឋអាមេរិក ដើម្បីបញ្ចប់សង្គ្រាមនេះ នៅទីក្រុង Abu Dhabi ប្រទេសអារ៉ាប់រួមក៏ដោយ ក៏រុស្ស៊ីកំពុង «ទម្លាក់គ្រាប់បែកលើប្រទេសអ៊ុយក្រែន ដោយព្យាយាមទម្លាក់គ្រាប់បែក និងធ្វើឲ្យពួកគេត្រជាក់ ដើម្បីឲ្យព្រមចុះចាញ់»។

នៅដើមកិច្ចប្រជុំរបស់ EU ក្នុងទីក្រុងប៊្រុចសែល ប្រទេសបែលហ្ស៊ិក លោកស្រីបាននិយាយថា៖ «វាគឺជារដូវរងាដ៏លំបាកមួយ ហើយប្រជាជានអ៊ុយក្រែន ពិតជាកំពុងរងទុក្ខវេទនា។ គ្រោះមហន្តរាយមនុស្សធម៌កំពុងជិតកើតមាននៅទីនោះហើយ»។

គួរបញ្ជាក់ថា រុស្ស៊ីបានបង្កើនការវាយប្រហាររបស់ខ្លួន ប្រឆាំងនឹងហេដ្ឋារចនាសម្ព័ន្ធថាមពល និងកម្ដៅរបស់អ៊ុយក្រែន ដោយធ្វើឲ្យប្រជាជនធ្លាក់ចូលទៅក្នុងភាពងងឹត និងត្រជាក់ ខណៈដែលសីតុណ្ហភាព បានចុះទាបដល់ដក ២០អង្សាសេ។

EU កំពុងប្រឹងប្រែងបង្កើនការគាំទ្រដល់បណ្តាញអគ្គិសនីរបស់អ៊ុយក្រែន និងកំពុងរៀបចំទណ្ឌកម្មថ្មីលើទីក្រុងមូស្គូ នៅខួបលើកទី៤ នៃការឈ្លានពានរបស់ប្រទេសនេះ នាខែក្រោយ៕