រដ្ឋមន្ត្រីការបរទេសសហភាពអឺរ៉ុប (EU) នាថ្ងៃព្រហស្បតិ៍ (ទី២៩ ខែមករា ឆ្នាំ២០២៦) បានអនុម័តទណ្ឌកម្មថ្មីលើអ៊ីរ៉ង់ ដោយកំណត់គោលដៅលើបុគ្គល និងអង្គភាពដែលពាក់ព័ន្ធនឹងការបង្ក្រាបដោយហិង្សាលើក្រុមបាតុករ និងការគាំទ្ររបស់ប្រទេសនេះ ចំពោះប្រទេសរុស្ស៊ី។ នេះបើយោងតាមអ្នកការទូត EU ដែលបាននិយាយនៅថ្ងៃនេះ។

រដ្ឋមន្ត្រីទាំងនោះក៏ត្រូវបានគេរំពឹងថា នឹងឈានដល់កិច្ចព្រមព្រៀងនយោបាយមួយ ដើម្បីរួមបញ្ចូលកងឆ្មាំបដិវត្តន៍ឥស្លាម (IRGC) របស់អ៊ីរ៉ង់ នៅក្នុងបញ្ជីអង្គការភេរវកម្មរបស់ប្លុក ដោយដាក់ IRGC ក្នុងប្រភេទស្រដៀងគ្នាទៅនឹងរដ្ឋឥស្លាម និងក្រុមអាល់កៃដា និងធ្វើការផ្លាស់ប្តូរនិមិត្តរូប នៅក្នុងវិធីសាស្រ្តរបស់អឺរ៉ុប ចំពោះភាពជាអ្នកដឹកនាំរបស់អ៊ីរ៉ង់។

សមាជិក EU មួយចំនួនដែលដឹកនាំដោយប្រទេសបារាំង មានការស្ទាក់ស្ទើរជាយូរមកហើយ ក្នុងការបន្ថែម IRGC ទៅក្នុងបញ្ជីនោះ ប៉ុន្តែទីក្រុងប៉ារីស បានឲ្យដឹងកាលពីថ្ងៃពុធថា ខ្លួននឹងគាំទ្រចំណាត់ការនេះ ដោយបើកផ្លូវឲ្យមានការអនុម័ត ទោះបីជាការសម្រេចចិត្តបែបនេះត្រូវការការឯកភាពគ្នា ក្នុងចំណោមសមាជិកទាំង ២៧របស់ប្លុកក៏ដោយ។

កងកម្លាំង IRGC ដែលបង្កើតឡើងបន្ទាប់ពីមានបដិវត្តន៍ឥស្លាមរបស់អ៊ីរ៉ង់ ក្នុងឆ្នាំ១៩៧៩ ដើម្បីការពារប្រព័ន្ធគ្រប់គ្រងរបស់មេដឹកនាំសាសនាឥស្លាមនិកាយស៊ីអ៊ីត មានឥទ្ធិពលយ៉ាងខ្លាំងនៅក្នុងប្រទេសនេះ ដោយគ្រប់គ្រងសេដ្ឋកិច្ច និងកងកម្លាំងប្រដាប់អាវុធជាច្រើន ហើយអង្គភាពនេះក៏ត្រូវបានចាត់តាំងឲ្យទទួលបន្ទុកកម្មវិធីមីស៊ីលបាលីស្ទិក និងនុយក្លេអ៊ែររបស់អ៊ីរ៉ង់ផងដែរ៕