ឆ្មាំល្បាតឆ្នេរ បានឲ្យដឹងថា សាកសពមនុស្សចំនួន ១១នាក់ទៀត ត្រូវបានស្រង់ចេញពីដែនទឹក នៅម្ដុំភាគខាងត្បូងប្រទេសហ្វីលីពីន នាថ្ងៃព្រហស្បតិ៍ (ទី២៩ ខែមករា ឆ្នាំ២០២៦) ពោលគឺប៉ុន្មានថ្ងៃបន្ទាប់ពីស្រឡាងមួយគ្រឿង បានក្រឡាប់លិច ហើយបានចាក់មនុស្សរាប់រយនាក់ចូលទៅក្នុងសមុទ្រ។

មន្ត្រីបានឲ្យដឹងនៅក្នុងសេចក្តីថ្លែងការណ៍មួយថា ការរកឃើញសាកសពបន្ថែមនេះ បានធ្វើឲ្យចំនួនអ្នកស្លាប់ដែលបានត្រូវបានបញ្ជាក់អះអាង កើនឡើងដល់ ២៩នាក់ហើយ ដោយមានរយៈ ៣ថ្ងៃបន្ទាប់ពីស្រឡាង MV Trisha Kerstin 3 បានលិចនៅភាគនិរតីនៃកោះ Mindanao កាលពីព្រឹកព្រលឹមថ្ងៃចន្ទ។

ស្រឡាងនេះដឹកអ្នកដំណើរ និងនាវិកយ៉ាងហោចណាស់ ៣៤៤នាក់ ដែលភាគច្រើនត្រូវបានជួយសង្គ្រោះភ្លាមៗ បន្ទាប់ពីកើតហេតុ។ អ្នកជួយសង្គ្រោះឈ្មោះ Yushrina Julkanain បានប្រាប់សារព័ត៌មាន AFP នៅថ្ងៃព្រហស្បតិ៍នេះថា ជនរងគ្រោះចុងក្រោយបំផុតភាគច្រើន ត្រូវបានរកឃើញនៅក្នុងតំបន់ ជុំវិញកោះ Baluk-Baluk ជិតកន្លែងដែលស្រឡាងបានលិច។

វីដេអូមួយដែលបានបង្ហោះ នៅបណ្ដាញសង្គម Facebook និងត្រូវបានផ្ទៀងផ្ទាត់ដោយសារព័ត៌មាន AFP បានបង្ហាញឲ្យឃើញថា អ្នកនេសាទម្នាក់កំពុងស្រង់ជនរងគ្រោះម្នាក់ដែលនៅតែពាក់អាវពោងសុវត្ថិភាពរបស់នាងចេញពីទឹក ដោយប្រើទំពក់ទាញ ខណៈវីដេអូមួយទៀតបានបង្ហាញនូវអ្វីដែលមើលទៅហាក់ដូចជាក្មេងតូចម្នាក់។

ការបញ្ជាក់ពីចំនួនជនរងគ្រោះថ្មី ១១នាក់នេះ បានធ្វើឲ្យមានការច្របូកច្របល់ ចំពោះការប៉ាន់ស្មានចំនួនអ្នកនៅលើស្រឡាង នៅពេលដែលវាលិច។ ការសរុបនៅមុននេះ បានដាក់ចំនួនមនុស្សដែលបាត់ខ្លួនមានចំនួន ១០នាក់ ក្នុងនោះរួមទាំងកាពីតែននាវា សមាជិកនាវិក ៨នាក់ និងមន្ត្រីសន្តិសុខម្នាក់។

អ្នកនាំពាក្យឆ្មាំល្បាតឆ្នេរហ្វីលីពីន លោកស្រី Noemie Cayabyab បានប្រាប់ស្ថានីយ៍វិទ្យុក្នុងស្រុកថា ចំនួនអ្នកបាត់ខ្លួន ឥឡូវនេះមិនច្បាស់លាស់នោះទេ៕