រយៈពេល ១ឆ្នាំ ក្រោយក្រុមឧទ្ទាម M23 រឹបអូសការគ្រប់គ្រងទីក្រុង Goma ដែលជារដ្ឋធានីរបស់ខេត្តយុទ្ធសាស្រ្ត North Kivu ស្ថិតនៅភាគខាងកើតសាធារណរដ្ឋប្រជាធិបតេយ្យកុងហ្គោ ដងផ្លូវមមាញឹកដោយការធ្វើដំណើររបស់អ្នកថ្មើរជើង និងការធ្វើចរាចរណ៍របស់រថយន្ត ហើយទីផ្សារប្រតិបត្តិការដូចធម្មតា ។

ប៉ុន្តែនៅលើដងផ្លូវទូទាំងទីក្រុងមួយនេះ អគារមួយចំនួនក្នុងចំណោមអគារសំខាន់បំផុត នៅតែបន្តបិទទ្វារ ។ នៅលើដងផ្លូវមួយខ្សែ ឡូហ្គោពណ៌លឿង និងខ្មៅនៅលើធនាគារ Rawbank បានបិទនៅលើទ្វារចាក់សោរ ហើយនិងម៉ាស៊ីនដកប្រាក់ ATM បិទដំណើរការ ។

គួរឲ្យដឹងថា នៅព្រឹកថ្ងៃចន្ទ ទី ២៧ ខែមករា ឆ្នាំ ២០២៥ ក្រុមឧទ្ទាម M23 រឹបអូសបានទីក្រុង Goma មុនពេលពួកគេរុលទៅកាន់កាប់តំបន់ភាគខាងកើតកុងហ្គោ ហើយនិងដណ្តើមគ្រប់គ្រងទីក្រុងសំខាន់ៗជាច្រើនទៀត ក្នុងរយៈពេលត្រឹមប៉ុន្មានសប្តាហ៍ និងប៉ុន្មានខែប៉ុណ្ណោះ ។

ស្របពេលដែលស្ថានភាពសន្តិសុខកាន់តែធ្ងន់ធ្ងរខ្លាំង ធនាគារទាំងអស់នៅក្នុងទីក្រុង Goma បានបិទទ្វារ ហើយទូដកប្រាក់ ATM បញ្ឈប់ប្រតិបត្តិការ ។ ផលប៉ះពាល់លើប្រជាពលរដ្ឋក្នុងស្រុក មានសភាពធ្ងន់ធ្ងរ និងបន្ទាន់ ។

អង្គុយនៅមុខទ្វារឱសថស្ថានដែលគាត់គ្រប់គ្រងស្ថិតនៅភាគកណ្តាលទីក្រុង Goma អ្នកស្រី Sheilla Zawadi បានមើលការធ្វើចរាចរណ៍លើដងផ្លូវ និយាយរៀបរាប់ពីវិធីបែបណាដែលធុរកិច្ចរបស់គាត់ ហើយនិងជីវភាពរស់នៅរបស់គាត់ បានផ្លាស់ប្តូរ កាលពីឆ្នាំមុន ។

អ្នកស្រីមានគណនីជាមួយធនាគារ Access Bank ប៉ុន្តែបានបាត់កាតធនាគាររបស់គាត់ មុនពេលទីក្រុងធ្លាក់ទៅក្នុងកណ្តាប់ដៃក្រុមឧទ្ទាម ហើយអ្នកស្រី ពុំមានកម្មវិធីធនាគារចល័តនោះទេ ដើម្បីប្រតិបត្តិការតាមអេឡិចត្រូនិក ។

សំណាងដែរ អ្នកស្រីនៅមានកាត Visa Card ដែលអាចឲ្យគាត់ដកប្រាក់បាន ពេលដែលគាត់អាចរកឃើញធនាគារ ឬទូដកប្រាក់ ATM ។

នៅក្នុងទីក្រុង Goma ពលរដ្ឋជាច្រើនហាក់ធូរស្បើយចំពោះការផ្លាស់ប្តូរការដឹកនាំ ប៉ុន្តែសម្រាប់ពលរដ្ឋផ្សេងទៀត ការងារលំបាកទើបតែចាប់ផ្តើមទេ សម្រាប់ពួកគេ ៕