ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (២៩ មករា) បានគំរាមកំហែងដំឡើងពន្ធថ្មី ទៅលើប្រទេសទាំងឡាយណា ដែលផ្គត់ផ្គង់ប្រេងទៅឱ្យប្រទេសគុយបា ដែលធ្វើឱ្យយុទ្ធនាការដាក់សម្ពាធរបស់លោក កាន់តែក្លាខ្លាំងឡើងប្រឆាំងនឹងកោះគ្រប់គ្រងដោយកុម្មុយនិស្តមួយនេះ ខណៈលោកក៏បាននិយាយថា គុយបា «នឹងមិនអាចរស់រានបានទេ»។

វិធានការនេះ ត្រូវបានអនុញ្ញាតដោយក្រឹត្យក្រោមសេចក្តីប្រកាសអាសន្នជាតិរបស់ទីក្រុងវ៉ាស៊ីនតោន ប៉ុន្តែមិនបានបញ្ជាក់ពីអត្រាពន្ធគយជាក់លាក់ណាមួយ ឬបានចង្អុលបង្ហាញថាជាប្រទេសណាមួយដែលផលិតផលរបស់ពួកគេអាចប្រឈមនឹងពន្ធគយរបស់សហរដ្ឋអាមេរិកនោះទេ។

នៅពេលត្រូវសាកសួរដោយអ្នកយកព័ត៌មានថា តើសហរដ្ឋអាមេរិក កំពុងព្យាយាម «ខ្ទប់ដង្ហើម» គុយបាមែនទែ? លោក Trump បាននិយាយថា លោកពុំមានចេតនាធ្វើដូច្នេះឡើយ ប៉ុន្តែបានទទូចថា ប្រទេសនេះកំពុងបរាជ័យហើយ ហើយបានប្រព្រឹត្តអាក្រក់ណាស់ចំពោះប្រជាជនរបស់ខ្លួន។

បន្ទាប់ពីយោធាអាមេរិកបានចាប់ខ្លួនប្រធានាធិបតីវ៉េណេស៊ុយអេឡាដែលត្រូវបានបណ្តេញចេញពីតំណែង លោក Nicolas Maduro ក្នុងការវាយឆ្មក់ដ៏គួរឱ្យភ្ញាក់ផ្អើលមួយកាលពីដើមខែនេះ លោក Trump បាននិយាយម្តងហើយម្តងទៀតអំពីចំណាត់ការប្រឆាំងនឹងគុយបា និងដាក់សម្ពាធលើថ្នាក់ដឹកនាំរបស់ប្រទេសនេះ។ លោក Trump បាននិយាយនៅសប្តាហ៍នេះថា «គុយបានឹងបរាជ័យក្នុងពេលឆាប់ៗ» ដោយបន្ថែមថា វ៉េណេស៊ុយអេឡា ដែលធ្លាប់ជាអ្នកផ្គត់ផ្គង់ប្រេងកំពូលរបស់កោះនេះ ថ្មីៗនេះមិនបានផ្ញើប្រេង ឬប្រាក់ទៅគុយបាទៀតនោះទេ។

លោក Trump បានប្រើប្រាស់ការគំរាមកំហែងពន្ធគយ ជាឧបករណ៍គោលនយោបាយការបរទេសពេញមួយអាណត្តិទីពីររបស់ខ្លួន។ ប្រធានាធិបតីគុយបា បាននិយាយនៅក្នុងខែមករានេះថា ទីក្រុងវ៉ាស៊ីនតោន ពុំមានសិទ្ធិអំណាចខាងសីលធម៌ ក្នុងការបង្ខំឱ្យមានកិច្ចព្រមព្រៀងលើគុយបាទេ៕