ដំណាក់កាលទីពីរនៃផែនការសន្តិភាពហ្កាហ្សារបស់ប្រធានាធិបតីសហរដ្ឋអាមេរិក Donald Trump ត្រូវបានចាប់ផ្ដើមអនុវត្ត ប្រហែលពីរសប្តាហ៍មុន ជាមួយនឹង "ក្រុមប្រឹក្សាសន្តិភាព" ថ្មីមួយដែលត្រូវបានបង្កើតឡើងដើម្បីតាមដានដែនដីនេះ រួមជាមួយនឹងគណៈកម្មាធិការបច្ចេកទេសប៉ាឡេស្ទីន។ប៉ុន្តែឧបសគ្គធំៗនៅតែមាន។

ទាំងនេះរួមមានការបដិសេធរបស់ក្រុមហាម៉ាស ក្នុងការរំសាយអាវុធ ការបន្តមានវត្តមានរបស់យោធា  អ៊ីស្រាអែលនៅក្នុងតំបន់ប៉ាឡេស្ទីនរងការឡោមទ័ព្ធមួយនេះ និងវិបត្តិមនុស្សធម៌កាន់តែធ្ងន់ធ្ងរ។

អ៊ីស្រាអែលត្រូវបានចោទប្រកាន់ពីបទរារាំងជំនួយ ជម្រក និងសម្ភារៈចាំបាច់ ខណៈព្យុះរដូវរងាគ្របដណ្ដប់ដែនដីហ្កាហ្សា។

ប្រជាជនប៉ាឡេស្ទីនជាច្រើននិយាយថា បទឈប់បាញ់  ដែលចូលជាធរមានកាលពីថ្ងៃទី១០ តុលា ឆ្នាំ២០២៥ បាននាំមកនូវភាពប្រសើរឡើងតិចតួចដល់ជីវិតប្រចាំថ្ងៃរបស់ពួកគេ។ 

អ្នកស្រុកហ្កាហ្សាបាននិយាយថា "ស្ថានភាពនៅតែដដែល។ ភាពអត់ឃ្លានតែជាភាពអត់ឃ្លាន ទុក្ខវេទនានៅតែជាទុក្ខវេទនា ភាពក្រីក្រនៅតែជាភាពក្រីក្រ ហើយការទម្លាក់គ្រាប់បែកក៏នៅតែបន្តឥតឈប់ឈរ។

ទន្ទឹមនឹងនេះ អ៊ីស្រាអែលបានចោទប្រកាន់ ក្រុមហាម៉ាសពីបទពន្យារពេលដោយចេតនាក្នុងការវិលត្រឡប់របស់ចំណាប់ខ្មាំងដែលបានស្លាប់ពីហ្កាហ្សា។ សាកសពចុងក្រោយទើបតែត្រូវបានរកឃើញក្នុងសប្តាហ៍នេះប៉ុណ្ណោះ។

ក្រុមអាជ្ញាធរសុខាភិបាលហ្កាហ្សាបាននិយាយកាលពីថ្ងៃពុធសប្ដាហ៍នេះថាចំនួនអ្នកស្លាប់ក្នុងសង្គ្រាមដ៏ហែកហួរនៅហ្កាហ្សាបានកើនឡើងដល់៧១.៦៦៧នាក់ ចាប់តាំងពីការផ្ទុះសង្គ្រាមថ្ងៃ៧តុលា២០២៣មក ខណៈអ្នករបួសកើនឡើងដល់១៧១.៤៣៤នាក់៕