ប្រធានាធិបតីអាមេរិក លោក Donald Trump បានលើកឡើងកាលពីថ្ងៃព្រហស្បតិ៍ (២៩ មករា) ថា លោកកំពុងរៀបចំផែនសម្រាប់កិច្ចពិភាក្សាបន្ថែមទៀត ខណៈអាមេរិក បានបញ្ជូននាវាចម្បាំងជាច្រើនគ្រឿងទៅកាន់មជ្ឈិមបូព៌ា ហើយប្រធានមន្ទីរបញ្ចកោណ លោក Pete Hegseth បាននិយាយថា យោធានឹងត្រៀមខ្លួនឱ្យរួចជាស្រេចដើម្បីអនុវត្តបទបញ្ជារបស់ប្រធានាធិបតី។

នៅពេលត្រូវបានសាកសួរអំពីស្ថានភាពនៃកិច្ចសន្ទនារបស់លោកជាមួយទីក្រុងតេអេរ៉ង់ បន្ទាប់ពីគំរាមវាយប្រហារទ្រង់ទ្រាយធំន លោកបានឆ្លើយតបថា «លោកធ្លាប់មានកិច្ចពិភាក្សា ហើយក៏កំពុងមានគម្រោងពិភាក្សាបន្ថែមទៀតផងដែរ»។ ថ្លែងប្រាប់អ្នកសារព័ត៌មានក្នុងព្រឹត្តិការណ៍មួយ លោក Trump បាននិយាយថា៖ អាមេរិក មាននាវាធំៗ និងមានអានុភាពខ្លាំងក្លាជាច្រើនគ្រឿង កំពុងធ្វើដំណើរឆ្ពោះទៅអ៊ីរ៉ង់នៅពេលនេះ ប៉ុន្តែលោកក៏សង្ឈឹមថា នឹងមិនចាំបាច់ប្រើប្រាស់កម្លាំងទាំងនេះទៅចុះ។

ដោយមានវត្តមានយោធាអាមេរិកយ៉ាងច្រើនសន្ធឹកសន្ធាប់ប្រមូលផ្តុំគ្នានៅក្នុងតំបន់ លោក Hegseth បាននិយាយក្នុងកិច្ចប្រជុំមួយថា «អ៊ីរ៉ង់មិនគួរបន្តសមត្ថភាពនុយក្លេអ៊ែរទេ ហើយយោធាអាមេរិក នឹងត្រៀមខ្លួនឱ្យបានរួចរាល់ដើម្បីអនុវត្តនូវអ្វីដែលប្រធានាធិបតីរំពឹងទុក ពីក្រសួងសង្គ្រាម» ដោយសំដៅលើក្រសួងការពារជាតិអាមេរិក។

សុន្ទរកថាទាំងនេះបានធ្វើឡើងបន្ទាប់ពីនាវាពិឃាតថ្មីមួយគ្រឿងរបស់កងទ័ពជើងទឹកអាមេរិក បានចូលទៅក្នុងដែនទឹកមជ្ឈិមបូព៌ារួចរាល់ហើយ នេះបើយោងតាមអ្វីដែលមន្ត្រីអាមេរិកម្នាក់បានប្រាប់សារព័ត៌មានរ៉យទ័រកាលពីថ្ងៃព្រហស្បតិ៍សប្ដាហ៍នេះ ខណៈក្រុមមន្ត្រីអ៊ីរ៉ង់ ក៏កំពុងរៀបចំខ្លួនសម្រាប់ការប្រឈមមុខដាក់គ្នាខាងយោធា ជាមួយសហរដ្ឋអាមេរិក។

លោក Trump បានលើកឡើងម្ដងហើយម្ដងទៀតអំពី «កងនាវាចម្បាំងដ៏ធំសម្បើម» របស់អាមេរិក ដែលកំពុងឆ្ពោះទៅតំបន់មជ្ឈិមបូព៌ា ហើយប្រភពពីក្រុមមន្រ្តីទីក្រុងវ៉ាស៊ីនតោន ក៏បាននិយាយថា លោក Trump កំពុងថ្លឹងថ្លែងជម្រើសនានាលើអ៊ីរ៉ង់ រួមទាំងលទ្ធភាពនៃការវាយប្រហារខាងយោធាផងដែរ៕