​វាយ​កូន​បាល់៖ ​កីឡាករ​អេ​ស្ប៉ា​ញ Rafael Nadal បាន​បន្ត​ទំរង់​អស្ចារ្យ​របស់​ខ្លួន​ក្នុង​ឆ្នាំ​២០២២ នេះ​ដោយ​បន្ត​ដំណើរ​ឡើង​វគ្គ ១៦​នាក់​ចុងក្រោយ​កម្មវិធី ATP Indian Wells នៅ​សហរដ្ឋអាមេរិក​ក្រោយ​យកឈ្នះ​កីឡាករ​អង់គ្លេស Dan Evans ៧-៥ និង ៦-៣​។

​​គិត​មកដល់ពេលនេះ Rafael Nadal មិនទាន់​ស្គាល់​បរាជ័យ​ឡើយ​ក្នុង​ឆ្នាំ២០២២ នេះ​ដោយ​ឈ្នះ ១៧ប្រកួត​ជាប់​គ្នា​។ ​កីឡាករ​វ័យ ៣៥ឆ្នាំ​លំដាប់​លេខ ៤ ពិភពលោក​រូបនេះ​មុន​មកដល់​វគ្គ​នេះ​ បាន​យកឈ្នះ​កីឡាករ​ម្ចាស់ផ្ទះ​អាមេរិក Sebastian Korda ទាំង​លំបាក​ផងដែរ​។ ​​ជុំ​បន្ត Nadal នឹងត្រូវ​ជួប​ជាមួយ​កីឡាករ​ម្ចាស់ផ្ទះ​អាមេរិក​មួយរូប​ទៀត​គឺ Reilly Opelka ដែល​ទើប​យកឈ្នះ​កីឡាករ​កាណាដា Denis Shapovalov ព្រឹក​មិញ ៦-៧(៤-៧), ៦-៤ និង ៦-៤​។ ​​ចំណែកឯ​កីឡាករ​លំដាប់​លេខ ១ ពិភពលោក​ថ្មី​សញ្ជាតិ​រុស្ស៊ី Denis Shapovalov មានជោគ​វាសនា​ខុសពី Nadal ដោយ​បរាជ័យ​ត្រឹម​វគ្គ ៣២នាក់​ចុង​ក្រោយនេះ​ក្រោម​ថ្វីដៃ​កីឡាករ​បារាំង Gael Monfils​។ ​​សិត​ដំបូង Monfils បាន​យកឈ្នះ ៦-៤ មុនពេល​ដែល Medvedev តាម​ស្មើ​វិញ​នៅ​សិត​ទី ៦-៣ តែ Monfils នៅ​សិត​កាត់សេចក្តី​ពិតជា​រឹងមាំ​ដោយ​យកឈ្នះ ៦-១​។

​​ក្រោយ​ឈ្នះ​ការប្រកួត​នេះ​កីឡាករ​បារាំង Monfils បាន​អបអរសាទរ​ជ័យជំនះ​របស់ខ្លួន​លើ​កីឡាករ​រុស្ស៊ី Medvedev ដោយ​ចង្អុល​ទៅកាន់​ភរិយា​សញ្ជាតិ​អ៊ុយ​ក្រែ​ន​របស់ខ្លួន​ ដែលជា​កីឡាការិនី​វាយ​កូន​បាល់​ដែរ Elina Svitolina​។​ ​​ជ័យ​ជំនះ​នេះ Gael Monfils នឹង​បន្ត​ឡើង​វគ្គ ១៦នាក់​ចុងក្រោយ​ជួប​ជាមួយ​កីឡាករ​វ័យ ១៩ឆ្នាំ Carlos Alcaraz ដែល​យកឈ្នះ​មិត្ត​រួម​ជាតិ​អេ​ស្ប៉ា​ញ Roberto Bautista Agut​។ ​​ចំណែក Deniil Medvedev ដែល​ទើប​ឡើងឈរ​លេខ ១ ពិភព​លោក​នោះនឹងត្រូវ​បញ្ចប់​តំណែង​កំពូល​នេះ​ត្រឹម ៣សប្តាហ៍​ប៉ុណ្ណោះ ពោលគឺ​កីឡាករ​ស៊ែ​ប Novak Djokovic នឹង​ឡើង​មកឈរ​លេខ ១ ពិភពលោក​វិញ​នៅ​ថ្ងៃ​ចន្ទ​សប្តាហ៍​ក្រោយ​៕

​អត្ថបទ​៖​នាង សុភា​វុ​ធ