វិមានក្រឹមឡាំង បាននិយាយកាលពីថ្ងៃព្រហស្បតិ៍ថា នៅតែមានឱកាសសម្រាប់ការចរចា នៅក្នុងការប្រឈមមុខដាក់គ្នារវាងសម្ព័ន្ធមិត្តទីក្រុងតេអេរ៉ង់ និងទីក្រុងវ៉ាស៊ីនតោន បន្ទាប់ពីប្រធានាធិបតីអាមេរិក លោក ដូណាល់ ត្រាំ បានគំរាមវាយប្រហារយោធាថ្មីលើប្រទេសអ៊ីរ៉ង់។

សហរដ្ឋអាមេរិក មិនបានច្រានចោលការប្រើប្រាស់កម្លាំងប្រឆាំងនឹងអ៊ីរ៉ង់ទេ ដោយក្រុមសិទ្ធិមនុស្សនិយាយថា ការបង្ក្រាបរបស់ទីក្រុងតេអេរ៉ង់លើការតវ៉ា បានបណ្តាលឲ្យមនុស្សរាប់ពាន់នាក់ស្លាប់។

អ្នកនាំពាក្យលោក Dmitry Peskov បានប្រាប់អ្នកសារព័ត៌មានរួមទាំងពីសារព័ត៌មាន AFP ថា «វាច្បាស់ណាស់ថា សក្តានុពលសម្រាប់ការចរចា គឺមិនទាន់អស់ទេ»។

លោកបានអំពាវនាវឲ្យ«គ្រប់ភាគីទាំងអស់បង្ហាញការអត់ធ្មត់ និងជៀសវាងវិធីសាស្រ្តនៃការប្រើប្រាស់កម្លាំង» ដោយនិយាយថា «ការប្រើប្រាស់កម្លាំងណាមួយ អាចបង្កើតភាពវឹកវរនៅក្នុងតំបន់ និងនាំឲ្យ មានផលវិបាកដ៏គ្រោះថ្នាក់ខ្លាំងបំផុត»។

លោក ត្រាំ បានព្រមានថា សហរដ្ឋអាមេរិក «ត្រៀមខ្លួនជាស្រេច មានឆន្ទៈ និងអាច» វាយប្រហារ  អ៊ីរ៉ង់ «ប្រសិនបើចាំបាច់»។

ប្រមុខការទូតរបស់សាធារណរដ្ឋឥស្លាម លោក Abbas Araghchi បាននិយាយថា កងកម្លាំងរបស់ប្រទេសនេះ បានត្រៀមខ្លួនរួចជាស្រេច ដើម្បី«ចាត់វិធានការឆ្លើយតាមភ្លាមៗ និងយ៉ាងខ្លាំងក្លា» ចំពោះការវាយប្រហារណាមួយរបស់សហរដ្ឋអាមេរិក។

គួរបញ្ជាក់ផងដែរ អ៊ីរ៉ង់បានលេចចេញជាសម្ព័ន្ធមិត្តសំខាន់មួយរបស់រុស្ស៊ី ក្នុងអំឡុងសង្គ្រាមនៅអ៊ុយក្រែន៕