សេតវិមានបានពង្រីកសមត្ថភាពរបស់ក្រុមហ៊ុនប្រេងអាមេរិក ក្នុងការធ្វើប្រតិបត្តិការនៅក្នុងប្រទេសវ៉េណេស៊ុយអេឡា។ នេះបើយោងតាមអាជ្ញាប័ណ្ណទូទៅដែលចេញផ្សាយដោយក្រសួងរតនាគារសហរដ្ឋអាមេរិក។      

ឯកសារនេះចែងថា ក្រុមហ៊ុនអាមេរិកត្រូវបានអនុញ្ញាតឲ្យធ្វើប្រតិបត្តិការទាក់ទងនឹង «ការនាំចេញ ការនាំចេញឡើងវិញ ការលក់ ការលក់បន្ត ការផ្គត់ផ្គង់ ការស្តុកទុក ការធ្វើទីផ្សារ ការទិញ ការដឹកជញ្ជូន ឬការដឹកជញ្ជូនប្រេងដែលមានប្រភពពីវ៉េណេស៊ុយអេឡា រួមទាំងការចម្រាញ់ប្រេងបែបនេះ»។ ឯកសារនេះដែរ   អនុវត្តជាពិសេសចំពោះប្រតិបត្តិការដែលពាក់ព័ន្ធនឹងក្រុមហ៊ុនប្រេងរបស់រដ្ឋវ៉េណេស៊ុយអេឡា PDVSA។

ទោះជាយ៉ាងណាក៏ដោយ ឯកសារនេះបញ្ជាក់ថា ការអនុញ្ញាតឲ្យធ្វើប្រតិបត្តិការមួយចំនួន នៅក្នុងវិស័យប្រេងរបស់ប្រទេសវ៉េណេស៊ុយអេឡា មិនពង្រីកដល់ប្រតិបត្តិការដែលពាក់ព័ន្ធនឹង «បុគ្គលដែលមានទីតាំងនៅ ឬរៀបចំឡើង ក្រោមច្បាប់នៃសហព័ន្ធរុស្ស៊ី សាធារណរដ្ឋឥស្លាមអ៊ីរ៉ង់ សាធារណរដ្ឋប្រជាធិបតេយ្យប្រជាមានិតកូរ៉េ សាធារណរដ្ឋគុយបា ឬអង្គភាពណាមួយ ដែលជាកម្មសិទ្ធិ ឬគ្រប់គ្រង ដោយផ្ទាល់ ឬដោយប្រយោល ដោយ ឬក្នុងការបណ្តាក់ទុនរួមគ្នា ជាមួយបុគ្គលបែបនេះទេ»។ អាជ្ញាប័ណ្ណនេះ ក៏ហាមឃាត់ប្រតិបត្តិការជាមួយក្រុមហ៊ុនដែលមានទីតាំងនៅសហរដ្ឋអាមេរិក ឬវ៉េណេស៊ុយអេឡា ដែលមានទំនាក់ទំនងដោយផ្ទាល់ ឬដោយប្រយោលជាមួយនឹងប្រទេសចិន៕