អាជ្ញាធរអាហ្វហ្គានីស្ថាន បាននិយាយកាលពីថ្ងៃព្រហស្បតិ៍ (២៩ មករា) ថា ចំនួនអ្នកស្លាប់ដោយសារអាកាសធាតុធ្ងន់ធ្ងរក្នុងប្រទេសដែលរួមរឹតដោយវិបត្តិមនុស្សធម៌មួយនេះ នៅក្នុងប៉ុន្មានថ្ងៃថ្មីៗនេះ បានបន្តកើនឡើងឥតឈប់ឈរដល់រាប់សិបនាក់ ដោយករណីចុងក្រោយបំផុត គឺជាការស្លាប់របស់ម្តាយម្នាក់ និងកូន ៦ នាក់របស់ស្រ្តីរូបនោះ នៅភាគខាងកើតនៃប្រទេស បន្ទាប់ពីភ្លៀងធ្លាក់ខ្លាំងបានបណ្តាលឱ្យលំនៅឋានរបស់ពួកគេដួលរលំអំឡុងពេលសម្រាន្តលង់លក់នៅពេលយប់។

យោងតាមលោក Said Tayeb Hammad អ្នកនាំពាក្យនគរបាលខេត្ត Nangarhar បានឱ្យដឹងថា ភ្លៀងដ៏ខ្លាំងក្លានៅភាគខាងកើតទីក្រុង Jalalabad ចាប់ពីយប់ថ្ងៃចន្ទ រហូតដល់ព្រឹកថ្ងៃពុធសប្ដាហ៍នេះ បានធ្វើឱ្យខូចខាតផ្ទះសម្បែងរបស់គ្រួសាររងគ្រោះ ដែលបានបាក់រលំភ្លាមៗនៅពេលយប់។

កាលពីថ្ងៃសៅរ៍ចុងសប្ដាហ៍កន្លងទៅ អាជ្ញាធរគ្រប់គ្រងគ្រោះមហន្តរាយជាតិអាហ្វហ្គានីស្ថាន បាននិយាយថា ព្រិលធ្លាក់ខ្លាំង និងភ្លៀងធ្លាក់ខ្លាំង បានសម្លាប់មនុស្សលើសពី ៦០នាក់ និងបង្ករបួសជាង ១០០នាក់ រួចទៅហើយនៅទូទាំងប្រទេស ខណៈដែលផ្ទះសម្បែងរាប់រយខ្នងត្រូវបានបំផ្លិចបំផ្លាញទាំងស្រុង ឬដោយផ្នែក។

អាហ្វហ្គានីស្ថានងាយរងគ្រោះនឹងព្រឹត្តិការណ៍អាកាសធាតុធ្ងន់ធ្ងរណាស់ ដោយព្រិល និងភ្លៀងធ្លាក់ខ្លាំងតែងបង្កទឹកជំនន់យ៉ាងគំហុក ដែលជារឿយៗបានសម្លាប់មនុស្សរាប់សិបនាក់ ឬរាប់រយនាក់ក្នុងពេលតែមួយ។ តួលេខអ្នកស្លាប់ដ៏ខ្ពស់នេះ បានកើតឡើងស្របពេលប្រជាជនអាហ្វហ្គានីស្ថាន បានត្អូញត្អែរថា «ស្ថានការណ៍កាន់តែអាក្រក់ទៅៗពីមួយថ្ងៃទៅមួយថ្ងៃ» ខណៈកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ ប៉ាន់ប្រមាណថា មានមនុស្ស ១៧ លាននាក់ កំពុងទប់ទល់នឹងភាពអត់ឃ្លានយ៉ាងធ្ងន់ធ្ងរ ដោយសារការកាត់បន្ថយជំនួយអន្តរជាតិ៕