ទីភ្នាក់ងារសារព័ត៌មានយ៉ុនហាប់ បានរាយការណ៍នៅថ្ងៃសុក្រ (៣០ មករា) នេះថា សហរដ្ឋអាមេរិក និងកូរ៉េខាងត្បូង មិនទាន់បានឈានដល់សេចក្ដីសន្និដ្ឋានណាមួយនៅឡើយទេ នៅក្នុងថ្ងៃដំបូងនៃកិច្ចចរចាទល់មុខគ្នាលើបញ្ហាពាណិជ្ជកម្ម បន្ទាប់ពីប្រធានាធិបតីអាមេរិក លោក Donald Trump បានគំរាមដំឡើងពន្ធលើទំនិញរបស់ប្រទេសនេះ។

យោងតាមយ៉ុនហាប់ រដ្ឋមន្ត្រីឧស្សាហកម្មកូរ៉េខាងត្បូង លោក Kim Jung-kwan ដែលបានទៅកាន់ក្រសួងពាណិជ្ជកម្មសហរដ្ឋអាមេរិក នៅទីក្រុងវ៉ាស៊ីនតោន សម្រាប់កិច្ចចរចា បាននិយាយថា លោកនឹងជួបជាមួយរដ្ឋមន្ត្រីពាណិជ្ជកម្ម លោក Howard Lutnick ម្តងទៀត ដើម្បីពិភាក្សាពីបញ្ហានេះ។

កាលពីថ្ងៃចន្ទដើមសប្ដាហ៍នេះ លោក Trump បានត្អូញត្អែរនៅលើបណ្តាញសង្គមថា សភាកូរ៉េខាងត្បូង មិនទាន់បានអនុម័តសេចក្តីព្រាងច្បាប់ដើម្បីសម្រេចចុងក្រោយលើកិច្ចព្រមព្រៀងពាណិជ្ជកម្ម ដែលត្រូវបានឯកភាពគ្នាកាលពីឆ្នាំមុននោះទេ ហើយបានគំរាមថា នឹងបង្កើនពន្ធលើរថយន្ត និងទំនិញផ្សេងទៀតរបស់កូរ៉េខាងត្បូង។

សុន្ទរកថានេះហាក់ដូចជាធ្វើឱ្យទីក្រុងសេអ៊ូលភ្ញាក់ផ្អើលយ៉ាងខ្លាំង ហើយក្រុមមន្ត្រីកូរ៉េខាងត្បូង ប្រញាប់ប្រញាល់ធានាដល់សហរដ្ឋអាមេរិកថា ខ្លួននៅតែប្តេជ្ញាអនុវត្តកិច្ចព្រមព្រៀងពាណិជ្ជកម្ម ដែលរួមមានការវិនិយោគយ៉ាងច្រើនសន្ធឹកសន្ធាប់លើគម្រោងអាជីវកម្មរបស់អាមេរិក ជាថ្នូរនឹងការកាត់បន្ថយពន្ធ៕