លោកប្រធានាធិបតី Donald Trump កាលពីថ្ងៃព្រហស្បតិ៍ (ទី២៩ ខែមករា) បាននិយាយថា សហរដ្ឋអាមេរិក កំពុងដកវិញ្ញាបនបត្រយន្តហោះពាណិជ្ជកម្ម Bombardier Global Express និងបានគំរាមដំឡើងពន្ធនាំចូល ៥០ភាគរយលើយន្តហោះផ្សេងទៀតដែលផលិតនៅក្នុងប្រទេសកាណាដា រហូតទាល់តែនិយតកររបស់ប្រទេសនេះ ទទួលស្គាល់យន្តហោះមួយចំនួនផលិតដោយក្រុមហ៊ុនគូប្រជែង គឺ Gulfstream របស់សហរដ្ឋអាមេរិក។

តាមរយៈការបង្ហោះនៅលើបណ្ដាញសង្គម Truth Social លោក Trump បាននិយាយអំពីដំណើរការផ្តល់វិញ្ញាបនបត្ររបស់ក្រុមហ៊ុន Gulfstream ថា៖ «សម្រាប់ហេតុផលណាមួយ ប្រសិនបើស្ថានភាពនេះមិនត្រូវបានកែតម្រូវភ្លាមៗទេនោះ ខ្ញុំនឹងគិតអត្រាពន្ធ ៥០ភាគរយពីប្រទេសកាណាដា លើយន្តហោះណាមួយ និងទាំងអស់ដែលលក់ទៅឲ្យសហរដ្ឋអាមេរិក»។

ការប្រកាសរបស់លោកបែបនេះ បានកើតឡើងស្របពេលមានភាពតានតឹងកាន់តែខ្លាំងឡើងៗ រវាងប្រទេសជិតខាងទាំង២ បន្ទាប់ពីនាយករដ្ឋមន្ត្រីកាណាដា លោក Mark Carney ដោយលើកឡើងពីគោលនយោបាយពាណិជ្ជកម្មរបស់សហរដ្ឋអាមេរិក កាលពីសប្តាហ៍មុន បានជំរុញឲ្យប្រទេសនានាទទួលយកការបញ្ចប់នៃសណ្តាប់ធ្នាប់សកលដែលផ្អែកលើច្បាប់ ដែលទីក្រុងវ៉ាស៊ីនតោនធ្លាប់បានគាំទ្រ។

ជាមួយគ្នានេះ លោក Trump ក៏បាននិយាយផងដែរថា លោកកំពុងដកវិញ្ញាបនបត្រ Bombardier Global Expresses របស់ពួកគេ និងយន្តហោះទាំងអស់ដែលផលិតនៅកាណាដា រហូតទាល់តែយន្តហោះរបស់ក្រុមហ៊ុន Gulfstream ត្រូវបានទទួលស្គាល់។

ការគំរាមកំហែងនោះ ប្រសិនបើត្រូវបានអនុវត្ត នឹងមានផលប៉ះពាល់យ៉ាងខ្លាំងទៅលើក្រុមហ៊ុនអាកាសចរណ៍អាមេរិក ដូចជា American Airlines និង Delta Air Lines ដែលពឹងផ្អែកលើយន្តហោះផលិត នៅកាណាដា សម្រាប់សេវាកម្មក្នុងតំបន់ជាច្រើនរបស់ពួកគេ។ ក្រុមហ៊ុន Delta បានបដិសេធមិនធ្វើអត្ថាធិប្បាយអ្វីឡើយ ហើយ American Airlines មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ៕