ប្រធានាធិបតីអាមេរិក លោក Donald Trump បាននិយាយកាលពីថ្ងៃព្រហស្បតិ៍ (ទី២៩ ខែមករា) ថា លោកសង្ឃឹមថា នឹងចៀសបានពីការមានវិធានការយោធា ប្រឆាំងនឹងអ៊ីរ៉ង់ដែលបានគំរាមដាក់គោលដៅលើមូលដ្ឋានទ័ព និងនាវាផ្ទុកយន្តហោះអាមេរិក ដើម្បីឆ្លើយតបទៅនឹងការវាយប្រហារណាមួយ។

លោក Trump បានបញ្ជាក់ថា លោកកំពុងជជែកជាមួយអ៊ីរ៉ង់ ហើយបានទុកលទ្ធភាព ដើម្បីបញ្ចៀសពីការមានប្រតិបត្តិការយោធា បន្ទាប់ពីបានព្រមាននៅមុននេះថា ពេលវេលាកំពុង «អស់ហើយ» សម្រាប់ទីក្រុងតេអេរ៉ង់ ខណៈដែលសហរដ្ឋអាមេរិកបញ្ជូនកងនាវាចរដ៏ធំមួយទៅកាន់តំបន់នេះ។

នៅពេលត្រូវបានសួរថា តើលោកនឹងមានការចរចាជាមួយអ៊ីរ៉ង់ដែរ ឬទេ លោក Trump បានប្រាប់អ្នកសារព័ត៌មានថា៖ «ខ្ញុំធ្លាប់មាន ហើយខ្ញុំកំពុងរៀបចំផែនការបន្ថែម»។ ខណៈដែលកំពុងនិយាយទៅកាន់ប្រព័ន្ធផ្សព្វផ្សាយ អំឡុងការចាក់បញ្ចាំងលើកដំបូងនៃភាពយន្តឯកសារ អំពីភរិយារបស់លោក គឺលោកស្រី Melania លោកប្រធានាធិបតីអាមេរិក បានបន្ថែមថា៖ «យើងមានក្រុមដ៏ធំមួយ កំពុងធ្វើដំណើរទៅកាន់កន្លែង ដែលមានឈ្មោះថា អ៊ីរ៉ង់ ហើយសង្ឃឹមថា យើងនឹងមិនចាំបាច់ប្រើក្រុមនោះទេ»។ 

ក្នុងពេលដែលទីក្រុងប្រ៊ុចសែល និងទីក្រុងវ៉ាស៊ីនតោន បានបង្កើនវោហាសាស្ត្រ ហើយអ៊ីរ៉ង់បានចេញការគំរាមកំហែងខ្លាំងៗ នៅសប្តាហ៍នេះ អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឲ្យមានការចរចា អំពីបញ្ហានុយក្លេអ៊ែរ ដើម្បី «បញ្ចៀសវិបត្តិដែលអាចនាំឲ្យមានផលវិបាកយ៉ាងធ្ងន់ធ្ងរ នៅក្នុងតំបន់»៕