កាលពីថ្ងៃព្រហស្បតិ៍ (ទី២៩ ខែមករា ឆ្នាំ២០២៦) ប្រធានាធិបតីអាមេរិក លោក Donald Trump បានលើកឡើងថា ក្រុមហាម៉ាសនឹងបោះបង់ចោលអាវុធរបស់ខ្លួន ជាជំហានមួយដែលក្រុមសកម្មប្រយុទ្ធមិនទាន់បានបញ្ជាក់នៅឡើយទេ ដោយនេះគឺជាអ្វីដែលនឹងជាការបោះជំហានទៅមុខដ៏សំខាន់ នៅក្នុងបទឈប់បាញ់ដ៏ផុយស្រួយជាមួយប្រទេសអ៊ីស្រាអែល។

លោក Trump បានប្រាប់កិច្ចប្រជុំគណៈរដ្ឋមន្ត្រីថា៖ «មនុស្សជាច្រើនបាននិយាយថា ពួកគេនឹងគ្មានថ្ងៃរំសាយអាវុធឡើយ។ ប៉ុន្តែវាហាក់ដូចជាពួកគេនឹងរំសាយអាវុធ»។

ជាមួយគ្នានេះ លោក Trump បានសាទរចំពោះកិច្ចសហប្រតិបត្តិការជាមួយក្រុមហាម៉ាស ដែលត្រូវបានសហរដ្ឋអាមេរិកចាត់ទុកថា ជាក្រុមភេរវករ បន្ទាប់ពីកងកម្លាំងអ៊ីស្រាអែលទទួលបានសាកសពចំណាប់ថ្នូរចុងក្រោយឈ្មោះ Ran Gvili ដែលត្រូវបានឃុំខ្លួននៅក្នុងតំបន់ហ្កាហ្សា។ លោក Trump បាននិយាយថា៖ «ពួកគេបានជួយយើងប្រគល់សាកសពទាំងនោះត្រឡប់វិញ ហើយក្រុមគ្រួសាររបស់ជនរងគ្រោះ មានការដឹងគុណយ៉ាងខ្លាំង»។

ចំណែកលោក Witkoff ដែលមានសុទិដ្ឋិនិយម បានសម្តែងទំនុកចិត្តខ្ពស់ថា ក្រុមហាម៉ាស នឹងរំសាយអាវុធ ដោយលោកបាននិយាយថា៖ «យើងបានបណ្តេញភេរវករចេញពីទីនោះ ហើយពួកគេនឹងដកទ័ពចេញ។ ពួកគេនឹងធ្វើដូច្នេះ ព្រោះពួកគេគ្មានជម្រើសទេ។ ពួកគេនឹងបោះបង់វា (អាវុធ)។ ពួកគេនឹងទម្លាក់កាំភ្លើង AK-47»។

ក្រុមហាម៉ាសបានបញ្ជាក់ថា ការប្រគល់សាកសពចំណាប់ថ្នូរចុងក្រោយ បានបង្ហាញពីការប្តេជ្ញាចិត្តរបស់ខ្លួន ចំពោះបទឈប់បាញ់ ប៉ុន្តែក្រុមនេះមិនទាន់បានរំសាយអាវុធរបស់ខ្លួននៅឡើយទេ រហូតមកដល់ពេលនេះ។ 

ក្រុមនេះបាននិយាយដដែលៗថា ការរំសាយអាវុធ គឺជាខ្សែបន្ទាត់ក្រហម ប៉ុន្តែក្រុមក៏បានលើកឡើងផងដែរថា ខ្លួននឹងបើកចំហសម្រាប់ការប្រគល់អាវុធទៅឲ្យអាជ្ញាធរគ្រប់គ្រងប៉ាឡេស្ទីន។ ការរំសាយអាវុធរបស់ក្រុមហាម៉ាស គឺជាផ្នែកសំខាន់មួយ នៅក្នុងឃ្លាទី២ នៃផែនការបទឈប់បាញ់ដែលបានចុះហត្ថលេខានៅក្នុងខែតុលាឆ្នាំមុន៕