ប្រធានាធិបតីអាមេរិកលោក Donald Trump បាននិយាយថា គណបក្សសាធារណរដ្ឋ និងប្រជាធិបតេយ្យនៅក្នុងព្រឹទ្ធសភា បានឈានដល់កិច្ចព្រមព្រៀងមួយ ដើម្បីបន្តទៅមុខជាមួយនឹងផ្នែកខ្លះនៃកញ្ចប់ថវិកាផ្ដល់មូលនិធិ។

សមាជិកព្រឹទ្ធសភា ទាំងពីគណបក្សប្រជាធិបតេយ្យ និងសាធារណរដ្ឋ បានយល់ព្រមលើកញ្ចប់ថវិកាចំនួន ៥ នៃសេចក្ដីព្រៀងច្បាប់ការចំណាយ កាលពីថ្ងៃព្រហស្បតិ៍ (ទី២៩ ខែមករា ឆ្នាំ២០២៦) ប៉ុន្តែបានដកសេចក្តីព្រាងច្បាប់ទី៦ ចេញពីកញ្ចប់ថវិកាដែលទាក់ទងនឹងមូលនិធិ សម្រាប់ក្រសួងសន្តិសុខមាតុភូមិ (DHS)។ នេះបើយោងតាមការផ្សាយរបស់ប្រព័ន្ធផ្សព្វផ្សាយ CBS News ដែលជាដៃគូអាមេរិករបស់សារព័ត៌មាន BBC។

លោក Trump បានគាំទ្រកិច្ចព្រមព្រៀងនេះ ហើយបានសរសេរបង្ហោះនៅលើបណ្តាញសង្គមថា៖ «សង្ឃឹមថា ទាំងគណបក្សសាធារណរដ្ឋ និងប្រជាធិបតេយ្យ នឹងផ្តល់ការបោះឆ្នោតយល់ព្រមដែលត្រូវការចាំបាច់បំផុត»។

កិច្ចព្រមព្រៀងនេះអនុម័តមូលនិធិ សម្រាប់ក្រសួងការពារជាតិ ក្រសួងសុខាភិបាល ក្រសួងរតនាគារ ប្រព័ន្ធតុលាការសហព័ន្ធ និងទីភ្នាក់ងារផ្សេងទៀត រហូតដល់ចុងបញ្ចប់នៃឆ្នាំសារពើពន្ធឆ្នាំ២០២៦ នាថ្ងៃទី៣០ ខែកញ្ញា។

ក្រុមប្រជាធិបតេយ្យ បានជំរុញឲ្យដកមូលនិធិ សម្រាប់ក្រសួងសន្តិសុខមាតុភូមិ (DHS) ចេញពីកញ្ចប់ចំណាយសហព័ន្ធចំនួន ១,២សែនកោដិដុល្លារ ចាប់តាំងពីភ្នាក់ងារសហព័ន្ធម្នាក់ បានសម្លាប់ពលរដ្ឋអាមេរិក ដែលជាជនរងគ្រោះទី២ នៅទីក្រុង Minneapolis កាលពីចុងសប្តាហ៍កន្លងទៅ អំឡុងយុទ្ធនាការបង្ក្រាបជនអន្តោប្រវេសន៍៕