មេដឹកនាំយោធានីហ្សេ លោក Abdourahamane Tiani កាលពីថ្ងៃព្រហស្បតិ៍ (ទី២៩ ខែមករា ឆ្នាំ២០២៦) បានស្តីបន្ទោសប្រធានាធិបតីបារាំង បេនីន និងកូតឌីវ័រ ដោយចោទថា បានគាំទ្រដល់ការវាយប្រហារលើអាកាសយានដ្ឋានអន្តរជាតិ នៅទីក្រុង Niamey ជាការចោទប្រកាន់ដែលលោកបានធ្វើឡើងដោយមិនបានផ្តល់ភស្តុតាងណាមួយឡើយ។

ស្នូរកាំភ្លើង និងការផ្ទុះខ្លាំងៗ បានបន្លឺឡើងនៅជុំវិញអាកាសយានដ្ឋានអន្តរជាតិនីហ្សេ នៅរដ្ឋធានី Niamey រយៈពេលខ្លី នៅមុនពាក់កណ្តាលអធ្រាត្រ ជាអ្វីដែលប្រភពសន្តិសុខ ២រូប បានពិពណ៌នាថា ជា «ការវាយប្រហារភេរវកម្ម» មុនពេលស្ងប់ស្ងាត់ទៅវិញ នាព្រឹកថ្ងៃព្រហស្បតិ៍។

លោក Tiani បានចោទប្រកាន់ប្រធានាធិបតីបារាំង កោក Emmanuel Macron លោក Patrice Talon របស់ប្រទេសបេនីន និងមេដឹកនាំកូតឌីវ័រ លោក Alassane Ouattara ដោយដាក់ឈ្មោះចំៗ ខណៈពេលកំពុងថ្លែងនៅលើកញ្ចក់ទូរទស្សន៍រដ្ឋនីហ្សេ បន្ទាប់ពីបានទៅត្រួតពិនិត្យមូលដ្ឋានទ័ពអាកាស។ លោកបានប្ដេជ្ញាសងសឹក។

ដោយបង្ហាញនូវសញ្ញាកាន់តែអាក្រក់ទៅៗបន្ថែមទៀតនៃទំនាក់ទំនង រវាងប្រទេសតំបន់ Sahel ជាប្រទេសជិតខាងដែលលោកចាត់ទុកថា ជាតំណាងរបស់បារាំង នៅក្នុងតំបន់ និងអតីតមហាអំណាចអាណានិគម លោក Tiani បានបញ្ជាក់ថា៖ «យើងបានឮសំឡេងគំរាមរបស់ពួកគេ។ តែពួកគេគួរតែត្រៀមខ្លួនឮសំឡេងគំរាមតបវិញយ៉ាងខ្លាំងក្លារាប់សិបដង»។

ការិយាល័យប្រធានាធិបតីបារាំង បេនីន និងកូតឌីវ័រ មិនអាចទាក់ទងសុំការអត្ថាធិប្បាយភ្លាមៗបានឡើយ ពាក់ព័ន្ធនឹងការលើកឡើងរបស់មេដឹកនាំនីហ្សេរូបនេះ ដែលចាប់តាំងពីដណ្តើមអំណាចមក មិនខុសបីមេដឹកនាំយោធា នៅក្នុងប្រទេសជិតខាងម៉ាលី និងប៊ួគីណាហ្វាសូ បានកាត់ផ្តាច់ទំនាក់ទំនងជាមួយមហាអំណាចលោកខាងលិច ហើយងាកទៅរកទីក្រុងមូស្គូសម្រាប់ការគាំទ្រផ្នែកយោធា ដើម្បីដោះស្រាយជាមួយការបះបោរ៕