រដ្ឋមន្ត្រីការបរទេសហ្គាណា លោក Samuel Okudzeto Ablakwa កាលពីថ្ងៃព្រហស្បតិ៍ បានសម្តែងការព្រួយបារម្ភយ៉ាងខ្លាំងចំពោះការកើនឡើងនូវអំពើភេរវកម្ម នៅអាហ្វ្រិកខាងលិច និងតំបន់សាហែល (Sahel) ។

ក្នុងអំឡុងពេលបើកសន្និសីទពិគ្រោះយោបល់កម្រិតខ្ពស់រយៈពេលពីរថ្ងៃស្តីពីកិច្ចសហប្រតិបត្តិការ និងសន្តិសុខក្នុងតំបន់ លោក Ablakwa បានព្រមានថា តំបន់នេះ បានបាត់បង់ជីវិតជាមធ្យម ៤៤ នាក់ ជារៀងរាល់ថ្ងៃ ដោយសារការវាយប្រហារភេរវកម្មទាំងនេះ។

រដ្ឋមន្ត្រីការបរទេសរូបនេះ បាននិយាយថា៖«ចំណុចកណ្តាលនៃអំពើភេរវកម្មសកល បានផ្លាស់ប្តូរពីមជ្ឈិមបូព៌ាមកតំបន់របស់យើង។ ឥឡូវនេះ យើងមានយ៉ាងហោចណាស់ ៤៧ ភាគរយ ទៅ ៥៩ភាគរយនៃអំពើភេរវកម្មសកលដែលបានកត់ត្រាទាំងអស់»។

យោងតាមលោករដ្ឋមន្ត្រី ការវាយប្រហារភេរវកម្ម បានកើនឡើង ១.២៦៦ ភាគរយ ក្នុងរយៈពេល ១៥ឆ្នាំកន្លងមក និងចំនួនអ្នកស្លាប់កើនឡើង ២.៨៦០ ភាគរយ ក្នុងរយៈពេលដូចគ្នា។

លោក Ablakwa បាននិយាយថា រួមជាមួយនឹងអំពើភេរវកម្ម គឺជាបញ្ហាចោរសមុទ្រនៅឈូងសមុទ្រហ្គីណេ និងការជួញដូរមនុស្សឆ្លងកាត់ព្រំដែនដ៏ធំទូលាយ ដែលបន្ថែមទៅលើការធ្លាក់ចុះនៃភាពធន់ នៅក្នុងសហគមន៍។

លោក Ablakwa បាននិយាយថា ការបែកបាក់ ការសង្ស័យ និងការចែករំលែកព័ត៌មានមានកម្រិត ធ្វើឲ្យ ថយចុះសមត្ថភាពរួម ក្នុងតំបន់ក្នុងការដោះស្រាយបញ្ហារួមគ្នា និងធ្វើឲ្យប៉ះពាល់ដល់អត្ថប្រយោជន៍សេដ្ឋកិច្ច និងសង្គមនៃសមាហរណកម្ម៕