លោកប្រធានាធិបតី Volodymyr Zelenskiy បានបញ្ជាក់នៅថ្ងៃសុក្រ (ទី៣០ ខែមករា ឆ្នាំ២០២៦) នេះថា អ៊ុយក្រែនត្រៀមខ្លួនរួចជាស្រេច ដើម្បីតបស្នងវិញ ប្រសិនបើរុស្ស៊ីបញ្ឈប់ការវាយប្រហាររបស់ខ្លួន លើហេដ្ឋារចនាសម្ព័ន្ធថាមពលរបស់ប្រទេស ជាអ្វីដែលបានធ្វើឲ្យរដ្ឋធានីគីវធ្លាក់ចូលទៅក្នុងស្ថានភាពត្រជាក់ ដោយលោកបានបន្ថែមថា មិនមានបទឈប់បាញ់ជាផ្លូវការ រវាងប្រទេសទាំង២ នោះទេ។

ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃព្រហស្បតិ៍ថា ប្រធានាធិបតីរុស្ស៊ី លោក Vladimir Putin បានយល់ព្រមមិនវាយប្រហារលើទីក្រុងគីវរយៈពេលមួយសប្តាហ៍ ដោយសារតែអាកាសធាតុត្រជាក់។ សីតុណ្ហភាព នៅក្នុងរដ្ឋធានីរបស់អ៊ុយក្រែនមួយនេះ ត្រូវបានគេព្យាករថា នឹងចុះដល់ដក ២៦អង្សាសេ នៅថ្ងៃអាទិត្យចុងសប្ដាហ៍នេះ។

លោក Zelenskiy បាននិយាយថា ឱកាស ក្នុងការបន្ថយជម្លោះនេះ ត្រូវបានស្នើឡើងដោយសហរដ្ឋអាមេរិក ក្នុងអំឡុងពេលមានកិច្ចចរចាសន្តិភាពត្រីភាគី នៅទីក្រុង Abu Dhabi ប្រទេសអេមីរ៉ាតអារ៉ាប់រួម កាលពីចុងសប្តាហ៍កន្លងទៅ។ ហើយលោកបានបញ្ជាក់បន្ថែមថា កាលបរិច្ឆេទ ឬទីតាំង សម្រាប់កិច្ចចរចាបន្ត ដែលបច្ចុប្បន្នគ្រោងធ្វើនៅថ្ងៃអាទិត្យនេះ នៅអារ៉ាប់រួម អាចនឹងកែប្រែ។

ក្នុងសុន្ទរកថាដែលចេញផ្សាយដោយការិយាល័យរបស់លោកនៅថ្ងៃសុក្រ លោក Zelenskiy បានប្រាប់អ្នកសារព័ត៌មាននៅទីក្រុងគីវថា៖ «អាមេរិកបានឲ្យដឹងថា ពួកគេចង់លើកឡើងពីបញ្ហានៃការបន្ធូរបន្ថយភាពតានតឹង ដោយភាគីទាំង២ បង្ហាញពីជំហានជាក់លាក់ឆ្ពោះទៅរកការបញ្ចៀសការប្រើប្រាស់សមត្ថភាពរយៈចម្ងាយឆ្ងាយ ដើម្បីបង្កើតបានឱកាសបន្ថែមទៀត សម្រាប់ការទូត»។

មិនមានការអត្ថាធិប្បាយភ្លាមៗពីវិមានក្រឹមឡាំងនោះឡើយ ជុំវិញសំណើ ដើម្បីឲ្យមានបទឈប់បាញ់ថាមពលនេះ៕