គេហទំព័រព័ត៌មាន Ynet របស់អ៊ីស្រាអែល បានរាយការណ៍នៅថ្ងៃសុក្រ (ទី៣០ ខែមករា ឆ្នាំ២០២៦) នេះថា នាវាពិឃាត ១គ្រឿងរបស់កងទ័ពជើងទឹកអាមេរិក បានចូលចតនៅកំពង់ផែ Eilat របស់អ៊ីស្រាអែល ខណៈដែលភាពតានតឹង រវាងទីក្រុងវ៉ាស៊ីនតោន និងអ៊ីរ៉ង់ កាន់តែឡើងកម្ដៅ។

គេហទំព័រ Ynet បានឲ្យដឹងថា ការទៅដល់នៃនាវាពិឃាតនេះ នៅកំពង់ផែភាគខាងត្បូង ក្នុងឈូងសមុទ្រ Aqaba ជិតព្រំដែនរបស់អ៊ីស្រាអែល ជាមួយអេហ្ស៊ីប និងហ្ស៊កដានី ត្រូវបានគ្រោងទុករួចហើយ និងជាផ្នែកមួយនៃកិច្ចសហប្រតិបត្តិការជាបន្តបន្ទាប់ រវាងយោធាអាមេរិក និងអ៊ីស្រាអែល។

ទាក់ទងនឹងសេចក្ដីរាយការណ៍នេះ កងទ័ពជើងទឹកអាមេរិក និងយោធាអ៊ីស្រាអែល មិនបានឆ្លើយតបភ្លាមៗនោះឡើយ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយ។

ការដាក់ពង្រាយនេះបានកើតឡើងនៅពេលដែលប្រធានាធិបតីអាមេរិក លោក Donald Trump បានបង្ហើបឲ្យដឹងថា លោកបើកចំហ សម្រាប់ការចរចាជាមួយអ៊ីរ៉ង់ ទោះបីជាទីក្រុងវ៉ាស៊ីនតោន បានបញ្ជូនធនធានយោធាបន្ថែមទៅកាន់តំបន់មជ្ឈិមបូព៌ាក៏ដោយ។

មន្ត្រីការពារជាតិអាមេរិកម្នាក់បានប្រាប់សារព័ត៌មាន Reuters ថា យោធាមិនអាចពិភាក្សា អំពីសេចក្ដីលម្អិតនៃប្រតិបត្តិការនេះបានទេ ដោយសាហេតុផលសន្តិសុខ ដោយបានបន្ថែមថា សុវត្ថិភាពរបស់សមាជិកយោធា គឺជាអាទិភាពចម្បង។

ចំណែកប្រធានមន្ទីរបញ្ចកោណ លោក Pete Hegseth បាននិយាយថា យោធាអាមេរិក បានត្រៀមខ្លួនរួចស្រេចហើយ ដើម្បីអនុវត្តវិធានការណាមួយដែលលោកប្រធានាធិបតីសម្រេច៕