អ្នកស្រុកនៅទីក្រុង Kolkata ស្ថិតនៅភាគខាងកើតប្រទេសឥណ្ឌា បានបង្ហាញក្តីបារម្ភរបស់ខ្លួន ក្រោយការឆ្លង ២ករណីនៃជំងឺនីប៉ាហ៍ ត្រូវបានរាយការណ៍នៅរដ្ឋ West Bengal ។

កាលពីថ្ងៃអង្គារ ក្រសួងសុខាភិបាលឥណ្ឌា បានបញ្ជាក់ពីករណីឆ្លងជំងឺនីប៉ាហ៍ ២ករណី នៅរដ្ឋ West Bengal ចាប់តាំងពីខែធ្នូ ឆ្នាំមុន ។ មនុស្ស ២នាក់ ដែលបានឆ្លងនោះ គឺជាកម្មករសុខភាព ហើយពួកគេទាំង ២នាក់ កំពុងស្ថិតក្រោមការព្យាបាលនៅមន្ទីរពេទ្យក្នុងស្រុក ។

ការបញ្ជាក់ពីករណីឆ្លងនេះ បង្កក្តីបារម្ភនៅរដ្ឋធានីរបស់រដ្ឋ West Bengal មួយនេះ ។ លោក Rohit Tiwari គឺជាអ្នកស្រុកមួយរូបរស់នៅក្នុងទីក្រុង Kolkata និយាយថា មនុស្សជាច្រើនរួមទាំងក្មេងៗ បានបាត់បង់ជីវិតរបស់ពួកគេដោយសារតែវា ។ ដូច្នេះហើយ ក្នុងរយៈពេលប៉ុន្មានថ្ងៃខាងមុខនេះ ពួកយើងត្រូវតែប្រឹងប្រយ័ត្នខ្ពស់ ។ ពួកយើងត្រូវតែពាក់ម៉ាស់ ពីព្រោះថា មកទល់នឹងពេលនេះ វ៉ាក់សាំងមិនទាន់ត្រូវបានផលិតនោះទេ សម្រាប់ជំងឺមួយនេះ ។

បណ្តាលប្រទេសនៅអាស៊ី រួមទាំងថៃ និងម៉ាឡេស៊ី បានបង្កើនវិធានការត្រួតពិនិត្យតាមអាកាសយានដ្ឋាន ក្រោយឥណ្ឌា បញ្ជាក់ករណីឆ្លងជំងឺនីប៉ាហ៍ ។

សូមបញ្ជាក់ថា ជំងឺនីប៉ាហ៍ ត្រូវបានកំណត់អត្តសញ្ញាណកាលពីឆ្នាំ ១៩៩៨ អំឡុងការរីករាលដាលឆ្លងនៅក្នុងចំណោមកសិករចិញ្ចឹមជ្រូក នៅម៉ាឡេស៊ី និងសិង្ហបុរី បើទោះបីជាក្រុមអ្នកវិទ្យាសាស្រ្តមានជំនឿថា វាបានរីករាលនៅក្នុងសត្វប្រចៀវអស់រយៈពេលរាប់ពាន់ឆ្នាំមកហើយក្តី ហើយពួកគេបានព្រមានថា ជំងឺនេះ អាចកើតចេញពីសត្វប្រចៀវ ។

សារព័ត៌មានក្នុងស្រុក រាយការណ៍ថា ករណីឆ្លងនៅរដ្ឋ West Bengal គឺជាករណីឆ្លងលើកដំបូងនៅក្នុងរដ្ឋ នារយៈពេលជិត ២ទសវត្សរ៍កន្លងមកនេះ បន្ទាប់ពីករណីឆ្លងស្លាប់មនុស្ស ៥នាក់ កាលពីឆ្នាំ ២០០៧ ៕