កាលពីថ្ងៃព្រហស្បតិ៍ម្សិលមិញ ក្រុមអ្នកបើកបរថយន្តធំនៅតំបន់បាល់កង់ខាងលិច រក្សាការបិទចំណតដឹកទំនិញរបស់ពួកគេនៅព្រំដែនជាមួយសហភាពអឺរ៉ុប(EU) ស្របពេលដែលរដ្ឋាភិបាលក្នុងតំបន់ ស្នើសុំ EU កែសម្រួលច្បាប់ដែលពួកគេនិយាយថា ធ្វើឲ្យមានការចំណាយបន្ថែមទៀតរាប់រយលានអឺរ៉ូ ។

ក្រុមអ្នកបើករថយន្តធំនៅបូស្នី ម៉ុនតេណេហ្គ្រូ ម៉ាសេដូនីខាងជើង និងស៊ែរប៊ី បានចាប់ផ្តើមតវ៉ាកាលពីថ្ងៃចន្ទ ប្រឆាំងនឹងការអនុវត្តរឹតត្បិតជាងមុនរបស់ EU លើប្រព័ន្ធចេញ-ចូលរបស់ពួកគេ ក្រោមច្បាប់ដែលពួកគេប្រឈមនឹងការឃាត់ខ្លួន និងការនិរទេស សម្រាប់លើសកំណត់ការធ្វើដំណើរនៅតំបន់ Schengen ។

នៅថ្ងៃតែមួយនេះ អ្នកនាំពាក្យ EU លោក Markus Lamert និយាយថា ប្លុកមួយនេះ កំពុងធ្វើការលើយុទ្ធសាស្រ្តទិដ្ឋាការថ្មីសម្រាប់ក្រុមអាជីពចល័តខ្ពស់ ដូចជាអ្នកបើកបររថយន្តធំ អត្តពលិក និងវិចិត្រករ ប៉ុន្តែអ្នកបើកបរនៅតែបន្តសម្ពាធ ។

នៅច្រកឆ្លងកាត់ព្រំដែន Batrovci រវាងស៊ែរប៊ី និងក្រូអាត ដែលជារដ្ឋមាជិក EU រថយន្តចម្ងាយជាង ១,៦គ.ម បានជាប់នៅតាមផ្លូវឆ្ពោះតៅកាន់ចំណតដឹកទំនិញ ។

ការបិទផ្លូវនេះ បានបង្អាក់ការដឹកជញ្ជូនតាមច្រករបៀងសំខាន់តភ្ជាប់ EU ទៅកាន់ទួរគី និងតំបន់មជ្ឈិមបូព៌ា ។

លោក Marko Cadez គឺជាប្រធានសភាពាណិជ្ជកម្មស៊ែរប៊ី និយាយថា ៩៣ភាគរយនៃការនាំចេញពីបណ្តាប្រទេសចំនួន ៤ ត្រូវបានបិទ បណ្តាលឲ្យមានការខាតបង់ប្រចាំថ្ងៃប្រហែល ៩២លានអឺរ៉ូ ៕