យោងតាមអ្នកនាំពាក្យការិយាល័យប្រធានាធិបតី លោកស្រី Claire Castro បានឲ្យដឹងថា មេដឹកនាំហ្វីលីពីន លោក Ferdinand Marcos Jr បានបដិសេធសំណើឲ្យប្រកាសឯកអគ្គរដ្ឋទូតចិន ប្រចាំទីក្រុងម៉ានីល គឺលោក Jing Quan ថា ជាបុគ្គលមិនត្រូវបានស្វាគមន៍នៅក្នុងប្រទេសនេះ។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ នាថ្ងៃសុក្រ (ទី៣០ ខែមករា ឆ្នាំ២០២៦) នេះ លោកស្រី Castro បាននិយាយថា លោកស្រីបានសួរលោក Marcos អំពីប្រតិកម្មរបស់លោក ចំពោះគំនិតដែលបានលើកឡើងដោយសមាជិកសភាមួយចំនួន បន្ទាប់ពីមានការតបតគ្នាទៅវិញទៅមកយ៉ាងក្តៅគគុក រវាងស្ថានទូតចិន និងសមាជិកសភាហ្វីលីពីន និងមន្ត្រីរដ្ឋាភិបាល។

លោកស្រីបានប្រាប់ថា លោក Marcos មិនបានឲ្យលោកស្រីសួរចប់ទាន់នោះទេ ដោយបានឆ្លើយបដិសេធយ៉ាងដាច់អហង្ការថា «ទេ»។ លោកស្រី Castro បានបញ្ជាក់ទៅអ្នកសារព័ត៌មានថា លោកប្រធានាធិបតីបាននិយាយថា «ទេ»។

ហើយនៅពេលត្រូវបានសួរថា តើលោក Marcos ប្រឆាំងយ៉ាងខ្លាំង ចំពោះចំណាត់ការនេះដែរ ឬទេ លោកស្រី Castro បានតបថា ចំពោះចម្លើយរបស់លោកប្រធានាធិបតី ទាក់ទងនឹងការអំពាវនាវឲ្យប្រកាសថា ឯកអគ្គរដ្ឋទូតជាបុគ្គលមិនត្រូវបានស្វាគមន៍នោះ គឺ «ទេ»។

តែទោះជាយ៉ាងនេះក្តី អភិបាលរងក្រុង Kalayaan លោក Maurice Philip Alexis Albayda បាននិយាយថា ឯកអគ្គរដ្ឋទូតរូបនេះ ត្រូវបានកំណត់ថា ជាបុគ្គលមិនត្រូវបានស្វាគមន៍រួចហើយ នៅក្នុងទីក្រុង Kalayaan របស់ខេត្ត Palawan នៅសមុទ្រហ្វីលីពីនខាងលិច។

គួរបញ្ជាក់ថា លោក Jing មិនបានវាយប្រហារប្រជាជនហ្វីលីពីនដោយផ្ទាល់ទេ ប៉ុន្តែឯកអគ្គរដ្ឋទូតចិនរូបនេះ និងអ្នកនាំពាក្យម្នាក់របស់ខ្លួន ថ្មីៗនេះ បានរិះគន់យ៉ាងខ្លាំង ចំពោះមន្ត្រីហ្វីលីពីន រួមទាំងមេបញ្ជាការឆ្មាំល្បាតសមុទ្រ លោក Jay Tarriela និងសមាជិកសភាជាច្រើនរូប ដែលបាននិយាយប្រឆាំងសកម្មភាពរបស់ចិន លើនាវា និងអ្នកនេសាទហ្វីលីពីន៕